БНСУ-д дунд сургуульд сурдаг 13 настай монгол охиныг дээд ангийн дөрвөн эмэгтэй сурагч нийлж зургаан цагийн турш зодож, хүчээр архи уулган, өрөөнд хорьсон ноцтой хэрэг гарсан талаар тус улсын MBC телевиз мэдээлсэн байна. Улмаар тэд хохирогч охинд албадан архи уулгаж видео бичлэг хийсэн байна. Бичлэгийг 5000 воноор зарж байсан бөгөөд нийтэд тархсанаар монгол охин сургуульдаа явах боломжгүй болж сэтгэл санааны хувьд маш хүнд байдалд орсон нь тодорхой. Бичлэг олон нийтэд тарсны дараа цагдаагийн байгууллагаас мөрдөн шалгах ажиллагаа явуулж эхэлсэн хэдий ч хоёр сурагч эрүүгийн хариуцлага хүлээх боломжгүй гэж шийджээ. Энэ талаар хохирогч охин "Гэмт этгээдүүд сургуульдаа явж байгаа. Гэтэл би энгийн амьдралдаа эргэн орж чадахгүй байна. Заримдаа би өөрөөсөө энэ миний буруу юм болов уу гэж асуудаг" хэмээн хэлжээ. 

Хохирогч охины эцэг эх Өмнөд Солонгост амьдраад 10 жил болж байгаа гэж MBC телевиз дамжууллаа. Энэ талаар Гадаад харилцааны яамнаас дэлгэрэнгүй мэдээлэл өгөх аж.