Иргэн Д.Булгантамир, Д.Амартүвшин нарыг хууль бусаар жагсаал цуглаан зохион байгуулсан хэргээр шүүхэд дуудаж, 500 мянган төгрөгийн торгууль ногдуулахаар болжээ.

    Энэ талаар Д.Амартүвшингээс тодруулахад “Долдугаар сард хэргийн материалтайгаа танилцан, найман сарын эхээр шүүх хурал болсон ч хэргийн материал дээрх нотлох баримт нь шаардлага хангахгүй гэсэн үнэдслэлээр шүүх хурал 14 хоногоор хойшилсон. Түүнээс хойш чимээгүй байж байгаад энэ долоо хоногийн эхээр маргааш шүүх хуралтай гэж мэдэгдсэн.

Тэгээд би шүүх хурлыг дөрөв дэх өдөр хүртэл хойшлуулж, өнөөдөр боллоо. Гэвч өнөө нотлох баримт нь шаардлага хангахгүй хэвээр байгаа мөртлөө Д.Булгантамир бид хоёрт шүүхээс 500 мянган төгрөгөөр торгох шийдвэр гаргалаа. Шаардлага хангахгүй нотлох баримтад үндэслэн торгох гэж байгаа тул бид давж заалдана. Хуулийн дагуу биднийг жагсаал, цуглаан зохион байгуулсан гэж торгох гэж байгаа бол биднээс хойш хэдэн мянган хүн цуглуулж, жагсаал хийсэн эрх мэдэлтнүүддээ ч шүүх адилхан зөрчлийн хэрэг үүсгэж, торгох байх гэж бодож байна” гэв.