Эрүүл мэндийн салбарын эмч, ажилтнууд цалингаа нэмүүлэх шаардлага тавьж, 10 дахь хоногтоо Сүхбаатарын талбай дээр суулт хийж байна. Тэгвэл өнөөдөр УИХ-ын гишүүдийн төлөөлөл суулт зарлаж байгаа эмч, эмнэлгийн байгууллагын ажилтнуудтай уулзлаа.

УИХ-ын гишүүн Ж.Чинбүрэн “Эрүүл мэндийн салбарын алба хаагчид хийсэн ажлаараа хөлсөө авах шударга үнэн тогтолцоо үнэхээр дутагдаж байна. “Ковид-19” цар тахал Монголын эрүүл мэндийн салбарын сүүлийн 30 жилийн сул талыг харууллаа. Байгалийн хүчин зүйлтэй тэмцэх энэ том тэмцэлд манай салбарын 50 гаруй алба хаагчид ажиллаж байгаа. Засгийн газрын төсвийн тодотголд зөвхөн эрүүл мэндийн салбарыг дэмжих зорилгоор 730 тэрбум төгрөгийн асуудлыг шийдлээ. Зөвхөн эрүүл мэндийн салбарын ачааллыг багасгахын тулд бусад боломжит төсвөөс хасахыг нь хасаад ингэж шийдсэн. Бид эрүүл мэндийн даатгалын санхүүжилтийн тогтолцоог өөрчилснөөр зөвхөн хоёр бус 3-6 дахин нэмэх боломж гарсан. Эрүүл мэндийн салбарын ажилтнуудын дээд хязгаарыг байхгүй болгосон. Хуучин төсвийн хуулиараа явдаг байсан энэ асуудлыг шийдвэрлэсэн. Би халатаа тайлаад энд ирэхдээ л эрүүл мэндийн салбарын ажилтнуудын эрх ашиг, хөдөлмөрийн үнэлэмжийг хамгаалж, үнэнч шударга байлгахаар шийдсэн. Тийм ч учраас үүний төлөө би та нартайгаа хамт байгаа шүү” гэсэн юм.