"Triple X HIT Awards" зохион байгуулагч “ХИТ” хөгжмийн хөтөлбөрийн хөтлөгч Т.Давааням агсны хүү Д.Даваадорж өнөөдөр мэдээлэл хийлээ.  

     Тэрбээр “Аавынхаа хийсэн бүтээснийг үргэлжлүүлнэ. Аав маань 1994 онд "Хөх тэнгэр" радио станцад сэтгүүлчээр ажилласнаас хойш 1997 онд "Нэг алхам" буюу тухайн үеийн "ХИТ" хөгжим мэдээллийн хөтөлбөрийн суурийг тавьсан. Тэр цагаас хойш 2012 онд хорвоогийн мөнх бусыг үзүүлтлээ идэвхтэйгээр Монголын рок попын ертөнцөд 17 жил өөрийнхөө хөдөлмөрийг зарцуулсан. Аав минь 2004 онд хип хоп хөгжмийн урсгалыг хөгжүүлэхэд хувь нэмрээ оруулж, олон нийтэд таниулж, тухайн үеийн найман хамтлагтай анхны хип хоп авардсыг зохион байгуулж байлаа. Тиймээс надад аавынхаа хийсэн ажлыг үргэлжлүүлэх санал тавьлаа. Ингэснээр хип хопын анхдагч үеийнхэндээ хүндлэл, шинэ үеийн уран бүтээлчдэд урам зориг өгөхийг зорьж  байна. Бид өнөөдөр тус арга хэмжээнийхээ зургаан шүүгчийн хоёрыг нь танилцуулж байна” гэв.