Дархан хотын иргэн, УИХ-ын гишүүн асан Мишигийн Чимэдцэрэнгийн нэрэмжит "Чингис мастер кросс" 23 дахь удаагийн уралдааны нээлтийг өнөөдөр буюу гуравдугаар сарын 18-ны өдөр Дархан-Уул аймгийн  “Найрамдал” талбайд хийлээ. Энэ удаагийн  уралдаанд Монголын мастер кросс ангиллын нийт 62 тамирчин оролцож хурд хүч авхаалж самбаагаа сорихоор хүрэлцэн ирсэн байна.

           Уралдааны ерөнхий ивээн тэтгэгчээр “Чингис Шар айраг” ХХК 23 дахь жилдээ ажиллаж байгаа юм. Ерөнхий зохион байгуулагчаар Монголын авто мастеруудын холбоо MAF Official, хамтран зохион байгуулагчаар Дархан-Уул аймгийн ЗДТГ, Соёл, урлагийн газар, “Залуучууд” театр, Захирагчийн ажлын алба, Цагдаагийн газар, Онцгой байдлын газар, Нэгдсэн эмнэлэг, Дархан хотын тохижилт үйлчилгээний газар зэрэг төрийн байгууллагууд ажиллаж байна. Ийнхүү жил бүрийн гуравдугаар сард тогтмол зохиож хэвшсэн “Чингис мастер кросс” авто уралдаан нээлтээ хийж тамирчид уралдааны талбай руу хөдөллөө.

        Үзэгчид төдийгүй тамирчид тэсэн ядан хүлээдэг тус уралдааны зам үзэгчдэд өрсөлдөөнийг бүрэн харах боломж олгодог. Мөн тамирчдын хувьд огцом өгсүүр, огцом уруу, гүн жалга руу харайж орох, гүн жалгаас дүүлж гарах гэсэн техникийн хурд, хүч, тамирчдын ур чадварын өрсөлдөөнөөс гадна шоу үзүүлбэр ихтэйгээрээ бусад кроссоос онцлогтой билээ.