Монголчууд багийн спортоор олимпод оролцох нь бидний хувьд мөрөөдөл байсан. Холын тэр мөрөөдлийг  3х3 сагсан бөмбөгийн эмэгтэй шигшээ баг биелүүлж “Токио-2020”-д  улсаа төлөөлөн оролцсон билээ. Монголын  спортын түүхэнд шинэ хуудас нээж байгаа сагсан бөмбөгийн 3х3 үндэсний шигшээ багийн тамирчин, ОУХМ Мэндсайханы Цэрэнлхам энэ өдөр мэндэлжээ.

     М.Цэрэнлхам хоёр талын спортын удамтай. Өвөө нь  волейболын ОУХМ  Долгорсүрэн гэж хүн бий.  Харин ээжийнх нь аав аймгийн арслан  Ш.Дамдинсүрэн. Аав, ээж нь мэргэжлийн тамирчин биш ч спортод элэгтэй хүмүүс. Тийм учраас М.Цэрэнлхамыг анх волейболын спортод оруулсан байдаг. Тэрбээр оюутан  болоод сагсан бөмбөгийн 18 хүртэлх насны улсын аварга шалгаруулах тэмцээнд оролцсон байна.

     Энэ нь түүний сагсан бөмбөгийн анхны тэмцээн байлаа.  Улмаар   шилдэг таван тоглогчийн нэг болсон нь энэ спортод улам гүн орох  шалтгааны нэг болжээ.  Түүнээс гадна  сурагчдын ДАШТ-д оролцох Монгол Улсын шигшээ багт багтаж байлаа. Оюутан байхдаа ШУТИС-ийн волейбол, сагсан бөмбөг, гандболын шигшээ багт тоглодог байжээ.