Монгол Улсын хөдөлмөрийн баатар, гавьяат тамирчин, Рио 2016 оны олимпын мөнгөн медальт, дэлхийн аварга, дэлхийн аваргын хошой хүрэл медальт Доржсүрэнгийн Сумъяа энэ өдөр мэндэлжээ.

        Дэлхийн аварга Сумъяа 1991 оны гуравдугаар сарын 11-ний энэ өдөр Увс аймгийн Баруунтуруун суманд төржээ. Тэрбээр 2016 онд Бразил Улсын Рио Де-Жанейро хотод болсон зуны олимпын ХХХI наадмаас мөнгө, 2017 онд Унгар Улсын Будапешт хотод болсон ДАШТ-ээс алт, 2015 онд Казахстан Улсын Астана хотод болсон ДАШТ-ээс хүрэл, 2014 оны ОХУ-ын Челябинск хотод болсон багийн ДАШТ-ний мөнгө, 2018 онд Азербайжан Улсын Баку хотод болсон ДАШТ-ээс хүрэл медаль хүртэж байлаа. Мөн тэрбээр Азийн Инчоны 2014, Жакарта 2018 наадмаас хүрэл, Ташкент 2012, Бангкок 2013 Азийн аварга шалгаруулах тэмцээнээс хүрэл, хүртэж байсан юм.

           Үүнээс гадна 2015 оны БНСУ-ын Гванжу хотод болсон дэлхийн оюутны их наадмаас алт, 2016 онд Узбекистан Улсын Ташкент хотод болсон Ази тивийн аварга шалгаруулах тэмцээнээс алтан медальт хүртэж байлаа.

         Д.Сумъяа аварга самбо бөхийн 2012, 2013, 2014 оны ДАШТ-ний гурван удаагийн аварга,  “World masters”-ийн дөрвөн удаагийн аварга болж байв. Д.Сумъяа аварга жүдо бөхийн түүхэн дэх Монгол Улсаас төрөн гарсан дөрөв дэх дэлхийн аварга юм. Түүний дэлхийн цом, гран при, гранд слам тэмцээнээс хүртсэн медалийг тоочоод барамгүй олон билээ.