Эмэгтэйчүүдийн “Snooker”-ын дэлхийн аварга шалгаруулах тэмцээн Тайланд Улсын Бангкок хотод үргэлжилж байна. Тус тэмцээнд 12 улсын 50 тамирчин өрсөлдөж байгаа юм. Тэмцээний шөвгийн найм өчигдөр тодроход Монголын 28 наст Б.Нарантуяа багтлаа.

        Тэрбээр шигшээ 32-т Энэтхэгийн тамирчныг 3-1-ийн харьцаагаар хожжээ. Улмаар шөвгийн 16-д дэлхийн гурван удаагийн аварга Хонконгийн Нг Он Ийг 4-2-ын харьцаагаар хожиж таамаг эвджээ.

       Дэлхийн аваргад оролцсон Монголын дөрвөн тамирчны нэг, дэлхийн аваргад анх удаа оролцож буй тэрээр урьдчилсан шатанд 2017 оны мөнгөн медальт Видяа Пиллайг ялж мөн л шуугиан тариад байна.

       Түүний шөвгийн наймын өрсөлдөгч нь дэлхийн чансааны тавд бичигдсэн Английн Жеми Хантерыг ялсан Тайландын Сирипапорн Нуантхамжам байх юм. Тэмцээн Бангкокийн цагаар өнөөдөр 10:00 цагт үргэлжилнэ.