Монгол Улсын тав дахь Ерөнхийлөгч асан, Монголын жүдо бөхийн холбооны ерөнхийлөгч Халтмаагийн Баттулга 1963 оны энэ өдөр Улаанбаатар хотод мэндэлжээ. Тэрбээр 1978 онд нийслэлийн арван жилийн 34 дүгээр дунд сургуулийг, 1982 онд Дүрслэх урлагийн дунд сургууль зураач мэргэжлээр тус тус төгссөн.

           Монгол Улсын гавьяат тамирчин Х.Баттулга самбо бөхийн дэлхийн аварга тамирчин юм. Дэлхийн аварга шалгаруулах тэмцээнд гурван удаа оролцож алт, мөнгө, хүрэл медаль хүртэж байсан. Мөн дэлхийн цомын тэмцээнээс алт, мөнгө, хүрэл медаль хүртэж байв.

       Х.Баттулга Монголын жүдо бөхийг дэлхийн зэрэглэлийн спорт болгон хөгжүүлж, олимпын нэг аварга, дэлхийн таван аварга тамирчдыг төрүүлэн гаргахад үнэтэй хувь нэмэр оруулсан ачтан билээ. Тэрбээр 2004 оноос улс төрд орж, 2017 онд Монгол Улсын Ерөнхийлөгч болж байлаа. Харин 2006 оноос хойш өдийг хүртэл Монгол жүдо бөхийн холбооны ерөнхийлөгчөөр ажиллаж байгаа.