Израиль Улсын Тел Авив хотод энэ сарын 16-18-ны өдрүүдэд жүдо бөхийн “TEL AVIV GRAND SLAM 2023” тэмцээн болно. Энэ удаагийн тэмцээнд 54 орны эрэгтэй 208, эмэгтэй 190, нийт 398 тамирчин барилдах мэдүүлэг өгсөн байна.

           Эрэгтэйчүүдийн 60 кг-ын жинд 26 барилдах мэдүүлэг өгчээ. Манай улсаас ОУХМ Э.Сумъяабазар, Б.Сүхбат нар барилдана. 66 кг-ын жинд 31 бөх байна. Энэ жинд Л.Өнөболд барилдах юм. Харин 73 кг-д 34 тамирчин барилдах мэдүүлэг өгчээ. Дэлхийн аварга, гавьяат тамирчин Ц.Цогтбаатар. Б.Эрдэнэбаяр нар 73 кг-д хүч үзнэ. 81 кг-д 31 бөх барилдах юм.

      Манай улсаас 81 кг-д ОУХМ Г.Болор-Очир, Б.Батболд нар барилдана. 90 кг-д 41 тамирчин барилдах мэдүүлэг өгсөн байгаа. Энэ жинд ОУХМ Г.Алтанбагана, Г.Пунцагцэрэн нар барилдах юм. Харин -100, +100 кг-ын жинд манай улсаас барилдах тамирчин одоогоор мэдүүлэг өгөөгүй байна.

         Эмэгтэйчүүдийн 48 кг-ын жинд 26 тамирчин барилдах мэдүүлэг өгчээ. Тус жинд ОУХМ Г.Наранцэцэг барилдах юм. 52 кг-ын жинд мөн 26 бөх барилдах мэдүүлэг өгсөн байна. Энэ жинд манай улсаас залуу тамирчин М.Нандин-Эрдэнэ хүч сорино. 57 кг-ын жинд 37 тамирчин барилдах аж. Энэ жинд манай улсын залуу тамирчин О.Оюунчимэг өрсөлдөнө. 63 кг-д 32 бөх барилдах юм байна. Манай улсаас залуу бөх Д.Есүй хүч үзнэ.

        Мөн түүнчлэн эмэгтэйчүүдийн 70 кг-ын жинд 33 тамирчин өрсөлдөнө. Энэ жинд манай улсаас Б.Баасанжаргал барилдана. -78 кг-ын жинд 17 бөх барилдах мэдүүлэг өгчээ. Энэ жинд манай залуу бөх О.Хүслэн өрсөлдөнө. +78 кг-ын жинд 19 бөх барилдах юм. Энэ жинд манай улсаас Д.Номинзул барилдах мэдүүлэг өгсөн байна.