“Бээжин-2022” өвлийн олимпын наадмын 13 дахь өдөр уран гулгалтын чөлөөт үзүүлбэрийн тэмцээн болж, өндөрлөлөө.

           Өвлийн олимпын наадмын түүхэнд дөрвөн эргэлттэй үсрэлт хийсэн анхны эмэгтэй тамирчин болж, мөн сэргээш хэрэглэсэн гэх шалтгаанаар дэлхий нийтийн анхаарлыг татсан ОХУ-ын Олимпын хорооны 15 настай уран гулгагч Камила Валиева өвлийн олимпын наадмынхаа сүүлийн үзүүлбэрээ гүйцэтгэв. Гэвч түүний хувьд өвлийн олимпын наадмын хамгийн сүүлийн үзүүлбэрийн дөрвөн минут 20 секунд амьдралынх нь хамгийн урт, удаан үргэлжилсэн дөрвөн минут байлаа. Сэтгэл санаа нь үймэж, уран зориггүй мөсөн талбайд гарсан Камила эхний элементээ гүйцэтгэхээсээ эхэлж алдаа гаргаж, үзүүлбэрээ дууссаны дараа тамирчдын хэсэгт ганцаар нулимс дуслуулан суугаа харагдах...

           Гэсэн ч ОХУ-ын Олимпын хорооны багийн бусад гишүүн уран гулгалтын чөлөөт үзүүлбэрт амжилттай оролцсон. Үзүүлбэрийн нийт дүнгээр Анна Щербакова алтан медаль медаль хүртэж, түүний араас мөн ОХУ-ын Олимпын хорооны тамирчин Александра Трусова удаалж, Японы уран гулгагч Каори Сакамото гуравдугаар байрт шалгарсан.

           Хэдий Анна Щербакова түрүүлсэн ч, чөлөөт үзүүлбэрт дөрөвлөсөн харайлтыг таван удаа гүйцэтгэсэн Александра Трусоваг үзэгчид ялалт байгуулна гэж байлаа. Энэ ч утгаар Александра Трусова тамирчдын хэсэгт хүрмэгцээ ОХУ-ын Олимпын хорооны бусад уран гулгагчтайгаа маргалдаж, алтан медаль хүртсэн Анна Щербаковад хандан “Үзэн ядаж байна” гэж хэлсэн талаар “The Guardian” агентлаг мэдээлсэн байна. Мөн шагнал гардуулах ёслолын дараа Александра Трусова хэвлэлийнхэнд “Тэмцээний үр дүнд сэтгэл хангалуун бус байгаа”-гаа мэдээлсэн аж.

           ОХУ-ын Олимпын хорооны тамирчдын хувьд “Бээжин-2022” өвлийн олимпын наадмын уран гулгалтын төрөл нулимстай, маргаантай, уур бухимдалтай өндөрлөж байна. Харин допинг хэрэглэсэн гэгдэж буй 15 настай уран гулгагч Камила Валиевагийн асуудлыг өвлийн олимп дууссаны дараа Спортын арбитрын шүүхээс эцэслэн шийдэх юм.

Эх сурвалж: The Guardian