Засгийн газраас хуралдаанаас гарсан зарим шийдвэрийг танилцуулж байна. Энэ үеэр Эрүүл мэндийн сайд Ж.Чинбүрэн мэдээлэл өглөө. Тэрбээр “Энэ жил 300 мянган хүнд томуугийн вакцин хийх ёстой байсан. Үүнд иргэд сайн хамрагдаж байна. Вакцин хийлгэх шаардлагатай зургаан сартайгаас таван настай 160 мянган хүүхэд байснаас 96 мянган хүүхэд вакцинаа хийлгэсэн байна. Мөн 60-с дээш насныхны 50 хувь нь вакцинаа хийлгэсэн байна.  Аравдугаар сард улсын болон хувийн эмнэлгүүд ханиад, томуугийн өвчлөлд бэлэн байх нь чухал. Энэ жил эрүүл мэндийн салбар кордорт хүүхэд гаргахгүй байх том зорилго тавиад байгаа. Ор бэлдэхээс гадна дархлаажуулалтын үйл ажиллагаа чухал гэдгийг томуугийн вакцины үр дүн харууллаа.  Эмч, эмнэлгийн ажилчдын цалинг нэмэхгүй байгаа шалтгаан нь 2025 оны Эрүүл мэндийн даатгалын сангийн нийт төсвөөс 316 тэрбум төгрөгийг 2024 оны өрөнд төлчихсөн юм. Хэрвээ тэр мөнгө байсан бол эмнэлгийн үйл ажиллагаанд хангалттай хүрнэ. 2025 оны өрийг 2026 оны төсвөөс төлөхгүй байх юм бол цалингаа 10 хувиар нэмэх боломж байгаа. Тиймээс төсвийн сахилга бат чухал байна. Эрүүл мэндийн даатгалын санд мөнгө нэмээд байхад мөнгө нь хаачсан нь тодорхойгүй байж болохгүй. Тиймээс даатгалын санхүүжилт шударга байх, хувийн улсын эмнэлгийг ялгахгүй байх ёстой. 2026 онд эрүүл мэндийн салбарын үйл ажиллагаа төсөвтөө багтах боломжтой байна” гэлээ.