МАН-ын Бага хурлын үеэр УИХ-ын гишүүн Б.Энхбаяраас сэтгүүлчид цаг үеийн асуудлаар тодрууллаа. Тэрбээр “УИХ-ын дарга Д.Амарбасгалан хэвлэлийн хурлаараа ямар ч баримт яриагүй. Сэтгүүлч Н.Өнөрцэцэгийг баригдсан асуудлаар Ерөнхий сайд, Ерөнхийлөгчийн Тамгыг газрын дарга, МАН-ын Ерөнхий нарийн бичгийн дарга, Хууль зүйн сайд, ЗГХЭГ-ын дарга гэсэн таван хүн уулзаад хорих уу, болих уу гэсэн тухай ярьсан гэж хэлсэн. Хэрвээ тэгж ярьсан бол Ерөнхий сайд намайг хөөх бүрэн эрхтэй байсан. Хууль зүй, дотоод хэргийн сайдаар ажиллаж байснаас өнөөдрийг хүртэл Д.Амарбаясгалан гэдэг хүнтэй уулзаагүй, устаар яриагүй. Түүний ярьсан бүхэн баримтаар үгүйсгэгдэж байгаа. Ямар ч баримт, үнэн хоёрыг үгүйсгэж болохгүй. Үнэнийг гуйвуулж болдог ч үгүйсгэгдэггүй. Тэгэхээр би үнэн тодорно гэж бодож байна. Сая Г.Дүүрэнгийн асуудал гарч ирлээ. Дахиад ч өөр хүн араас нь гарч ирнэ. Би даваа гарагт хуулийн байгууллагад өөрөө очиж гэрчийн мэдүүлэг өгнө. Өөрт байгаа нотлох баримт, эх сурвалжуудыг нотлох баримттай өгнө. Тухайлбал, нэг хурлын тэмдэглэл олдохгүй байгаа тухай ярьсан. Энэ асуудлыг бүтэн цагийн турш сонсгол дээр асуусан. Сайд нарын устгачихсан гэж бодоод байгаа баримт нь надад байгаа. Түүнийг хуулийн байгууллагад өгнө” гэв.