УИХ-ын чуулганы нэгдсэн хуралдаанаар "Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл"-ийн нэгдүгээр хэлэлцүүлгийг хийж байна. Хэлэлцүүлж байгаа асуудалтай холбоотой УИХ-ын гишүүд асуулт асууж, хариулт авч байна. 

УИХ-ЫН ГИШҮҮН Ө.ШИЖИР: Бизнесийн орон зайг тэлэх, татвар төлөгчдийн тоог нэмэх боломжийг ямар ч нөхцөлгүй 10 жил боллоо. Засгийн газар сайд нар юугаараа төрийн оролцоог багасгаж байгаа юм бэ. Алт зэс нүүрс гээд гурван зүйлээс төсвийн орлогоо бүрдүүлдэг. Гэтэл төсөвт энэ тоог хийсвэрээр оруулж ирсэн байна. Хил хаалттай байх үед 2022 онд 23 тонн, 2023 онд 21 тонн алт олборлож байсан. Өнөөдөр найман тонн хүрэхгүй алт нийлүүлж байна. Нөгөө талаараа алт олборлодог аж ахуйн нэгжүүд нэмэгдсэн ч тушаалт бага байна. Дэлхийн түүхэндээ хамгийн өндөр цэгт алт ирчихсэн байтал алт тушаалт багассан байгаа нь хууль бус алт хилээр гарч байна гэсэн үг. Төсвийн хүрээний мэдэгдлээ зөв бодож, тооцооллоо зөв хийх хэрэгтэй байна.