Засгийн газраас сайжруулсан түлшний үнийг 50 хувь хөнгөлөх шийдвэр гарсан. Сайжруулсан түлшний нөөц ямар байгаа талаар Эрчим хүчний сайд Н.Тавибэх "Энэ жил нийслэлд 710 мянган тонн сайжруулсан түлш хэрэгцээтэй гэсэн. Өнөөдрийн байдлаар өдөрт 2800-3000 тонн сайжруулсан түлш үйлдвэрлэж байна. Хэрэглээ одоогийн байдлаар өдөрт 2800 тонн байгаа. Сайжруулсан түлшийг хийхэд ашигладаг недлингийн түүхий эд 517 мянга тонн нөөцтэй. Сард нийслэлийн сайжруулсан түлшний хэрэглээ 90 мянган тонн байгаа.

Хагас сарын хэрэглээтэй дүйцэх сайжруулсан түлшний нөөц бий. Улаанбаатар хотын сайжруулсан түлшний нөөцийг хангахаар нийслэлийн зүүн талд баригдаж буй шинэ үйлдвэрийн барилгын ажил 97 хувьтай явж байна. Энэ долоо хоногт хүлээлгэн өгөх төлөвлөгөөтэй байгаа. Үйлдвэр ашиглалтанд орвол үйлдвэрлэлийн хэмжээ хоёр дахин нэмэгдэнэ. Цаашид сайжруулсан түлшний нөөц хангалттай болно. Ахуйн хэрэглэгч нарын нүүрсний үнийг 50 хувиар бууруулж байна. Цахилгаан эрчим хүчний үнэ нэмэгдээгүй. Цаашид нэмэгдэх шаардлага бий. Гэхдээ цар тахалтай холбоотой үнийг нэмэхгүй. Иргэд гэртэй байгаатай холбоотой цахилгааны хэрэглээ нэмэгдэж байна. Цаашид иргэд цахилгаан дулаантай холбоотой асуудлаар гомдол мэдээллээ утсаар өгөх боломжтой болж байгаа. Энэ талаар холбогдох газарт нь үүрэг өгсөн.