УОК-оос цаг үеийн асуудлаар мэдээлэл хийлээ. Улаанбаатар хотоос хулгайн замаар Хэнтий аймгийн Баянхутаг суманд очсон иргэнээс коронавиурсийн халдвар илэрсэн бөгөөд PCR-аар нягтлаж байгаа юм. Өнөөдрийн хурлаар дээрх асуудал хийгээд хөдөө орон нутгийн иргэдийг хотоос гаргах эсэх асуудлыг хэлэлцсэн байна.

Энэ талаар Засгийн газрын Хэвлэл мэдээлэлтэй харилцах хэлтсийн дарга Ц.Ганзориг “Цар тахлын хариу арга хэмжээ хэрхэн хэрэгжиж байгааг судалж Шадар сайд аймгийн Засаг дарга нарт чиглэл өгсөн.Хэнтий аймагт коронавирусийн халдвар илэрсэн иргэний шинжилгээний хариуг 17:00 цагийн Эрүүл мэндийн яамны мэдээллээр дамжуулна. Эхний шинжилгээгээр эерэг гарч PCR-аар сөрөг гарах тохиолдол байгаа. Түүнчлэн хөдөө орон нутгийн иргэдийг буцаана гэдэг ташаа мэдээлэл гарсан. 21 аймгийн орох гарах хөдөлгөөнийг хаасан байгаа. Мөн УИХ-ын даргын зөвлөлд Шадар сайд хандаж, мэдээллийг нэг цонхоор түгээх талаар УИХ-ын гишүүдэд албан бичиг илгээсэн. Бүрэн бус мэдээлэл түгээхгүй байх талаар шат шатны арга хэмжээ авна. Мөн "Энхсаран" сувилалд гарч байгаа асуудалд хууль зөрчигдсөн талаар хуулийн байгууллагад чиглэл өгсөн. Нөөцийн мах түгээхэд хүндрэлтэй асуудал гарч байгааг анхаарч, хүнсний дэлгүүрээр түгээх, борлуулалтын цэгийг нэмэхээр болсон. Хуурамч мэдээлэл түгээх нь их байна. Тиймээс хуулийн байгууллагууд энэ талаар анхаарч, хатуу шаардлага тавина. Алтанбулаг боомт хаасантай холбоотой цаг үеийн мэдээллийг хэлэлцлээ” гэлээ.