“Иргэдийн шударга шүүх” төрийн бус байгууллагын тэргүүн Х.Бат-Ялалт, ХҮН-ын гишүүн Д.Үүрцайхтай “Парламент” телевизийн “Аргумент” хэлэлцүүлэгт оролцож байхдаа маргалдаж, зодолдож буй бичлэг нь задарсан. Юунаас болж маргалдсан талаар Х.Бат-Ялалтаас тодрууллаа. 

Тэрбээр “Би өнөөдөр “Парламент” телевизийн 15:00 цагийн шууд нэвтрүүлэгт оролцсон. Бид хариуцлагын асуудлаар ярилцаж байсан юм. Би хувь хүн, улстөрчийн хариуцлагаас бидний хариуцлага эхлэх ёстой гэдэг тухай ярьсан юм. Нам дагасан хүмүүс зөвхөн УИХ-ын гишүүнийг эгүүлэн татдаг хариуцлагатай болох тухай ярьж байгаа бол авлига, албан тушаалын гэмт хэрэгтэй тэмцэх тухай заавал ярих ёстой. Тийм үндсэн бодлогогүй зүйл ярьж болохгүй. Тиймээс зарчмын маргаантай асуудлаас болж бид маргалдсан. Шууд нэвтрүүлгийн үеэр Д.Үүрцайх намайг яриулахгүй дундуур дайраад байсан. Бид уулзаж ойлголцоогүй байгаа. Би шууд нэвтрүүлгээс явсан. Харин Д.Үүрцайх нэвтрүүлгээ үргэлжлүүлсэн байна лээ. Бидний зодолдсон асуудал чухал биш” гэв.