“Монголдоо сайхан амьдаръя” уриатай жагсаал хоёр дахь өдрөө үргэлжилж байгаа билээ. Ерөнхий сайд Л.Оюун-Эрдэнэ өнөөдөр жагсагч нартай уулзаж, Засгийн газрыг ээлжит бусаар яаралтай хуралдуулж, шийдвэр гаргахаар болсон юм билээ. Тэгвэл 17:00 цагт эхэлсэн Засгийн газрын хуралдаан дөнгөж сая дуусаж, жагсагч нарт шийдвэрээ танилцуулж байна.

         Ерөнхий сайд Л.Оюун-Эрдэнэ “Монгол Улсын Үндэс хуулийн дагуу үг хэлэх, үзэл бодлоо илэрхийлэх эрхээ эдэлж байгаа ардчилсан улсын залуучуудын тавьсан 15 зүйл бүхий шаардлагыг Засгийн газар хэлэлцлээ. Нэгдүгээрт, үнийн өсөлттэй холбоотой тавьсан шаардлага байлаа. Энэ асуудлаар холбогдох дарга нартай холбогдож, ярьж хэлэлцлээ. Засгийн газраас Үнийн өсөлт, гол бараа бүтээгдэхүүний хомсдолоос урьдчилан сэргийлэх, сөрөг нөлөөллийг бууруулах тухай хуулийг дөрөвдүгээр сарын 15-ны дотор хэлэлцэж, эцэслэн батлахаар боллоо. Дэлхийн зах зээлд огцом өсөж байгаа мах, гурил, шатахуун болон хэлэлцүүлгийн явцад шаардлагатай гэсэн бараа бүтээгдэхүүний үнийг барихаар боллоо.

Хоёрдугаарт, Засгийн газрын хуралдаан ЦЕГ, ТЕГ-ын удирдлагууд оролцож, мэдээлэл хийлээ. Жагсаал, цуглаантай холбоотой асуудлаар саатуулсан иргэдийг бүрэн сулласан гэж хэлсэн. Мөн ямарваа нэгэн байдлаар дахиж асуудал үүсгэхгүй гэдэг амлалтыг Ерөнхий сайдад амлалаа.

Гуравдугаарт, авлига, албан тушаалын хэрэгт холбогдсон этгээдийн хэргийг хялбаршуулсан буюу ял наймаалцахгүй байдлаар шийдэхгүй байх. Авлигын хэргийн ялын бодлогыг чангатгах, хуулийн төслийн УИХ-д өргөн барих боллоо. Мөн АТГ авлигын хэргийн ялгалгүй шалгах болсон гэдгийг та бүхэнд дуулгаж байна” гэлээ