Сүхбаатарын талбайд жагсаж байгаа залуусын өмнө Ерөнхий сайд, Хууль зүй дотоод хэргийн сайд хоёр нь ээлж ээлжээрээ гарч ирж, уучлалт гуйгаад их л айсан шинжтэй.

Үнийн өсөлтийг эсэргүүцсэн залуус өчигдөр өглөөнөөс шөнө дунд хүртэл Сүхбаатар талбайд жагсав. Гэтэл цагдаагийн алба хаагчид иргэдийг нохой шиг чирж, нүүр рүү өшиглөж, жагсаал эсэргүүцэгч усан цацдаг хуягт машин оруулж ирээд л сүрийг үзүүллээ. Улмаар 60 гаруй залууг баривчилж, түр саатуулсан байгаа юм.

“Ажлаа хий” хэмээн эсэргүүцсэн жагсагчид өчигдрөөс Ерөнхий сайд Л.Оюун-Эрдэнэтэй уулзах шаардлага тавьж байсан. Тэгвэл өнөөдөр Ерөнхий сайд Сүхбаатар талбайд гарч ирж жагсагчидтай уулзав.

Ерөнхий сайд Л.Оюун-Эрдэнэ жагсагчдын зүгээс тавьж байгаа бүх шаардлагыг хүлээн авч мэдэгдэж, уучлалт гуйлаа. Жагсагчдын төлөөлөл өнгөрсөн шөнө баригдсан залуусыг бүгдийг нь суллахыг шаардахад Ерөнхий сайд “Би өчигдөр ХЗХД-ийн сайд Х.Нямбаатарт хандаж, “Хүч хэрэглэж болохгүй шүү” гэж хэлж байсан. Өнөөдөр Х.Нямбаатар сайд, ЦЕГ-аас надад “Хүн барьсан асуудал байхгүй” гэж мэдэгдсэн. Хэрэв энэ нь худал байвал би холбогдох албан тушаалтнуудад хатуу хариуцлага тооцоход бэлэн байна” гэснээ “Х.Нямбаатарыг дууд” гэв.

                Цаанаас нь Хууль зүй дотоод хэргийн сайд Х.Нямбаатар гүйсээр гарч ирээд “Одоо дотоод албан шалгалт хийж байгаа. Өнгөрсөн шөнө өөрт ногдсон хэм хэмжээгээ хэтрүүлэн ашигласан нэр бүхий цагдаагийн алба хаагчдын өмнөөс уучлалт гуйж байна” гэлээ.

Залуусын хийж байгаа жагсаал нь цаашлаад Засгийн газар “ойчих” шалтгаан болох вий гэхээс Л.Оюун-Эрдэнэ, Х.Нямбаатар хоёрын “хөлс нь цувж”, “өвдөг нь чичигнэж” байгаа бололтой.