Төв аймгийн Лүн сумын Өгөөмөр багийн Бор хошуу гэдэг газар  Туул голын эрэг дагуу зугаалж явсан зургаан иргэний нэг нь усанд живжээ. Тэрбээр Н хэмээх есөн настай охин байжээ. Тиймээс эрлийн ажиллагаа хэрхэн үргэлжилж байгаа болон ямар шалтгааны улмаас усанд осолдсон талаар Тус сумын Засаг даргын Тамгын газрын дарга Б.Оюунтуяагаас тодрууллаа.

        Тэрбээр “Эрлийн ажиллагаа үргэлжилж байна. Өчигдөр аймгийн Онцгой байдлын газрын Лүн сум дахь Эрэн хайх, аврах бүлэг, Цагдаагийн хэсгийн алба хаагчид, ар гэрийнхэн Өгөөмөр багийн бетон гүүрнээс Улаан-Үзүүр гэдэг газар хүртэл 13 км-т завиар, голын эрэг дагуу таван  км-т автомашинаар, дөрвөн метрийн гүнд долоон удаа шумбалт хийж, үр дүнд хүрээгүй. Тиймээс эрлийг өглөөний 06.00 цагт 12 хүний бүрэлдэхүүнтэй дахин эхлүүлсэн. Энэ жил манай сумын нутаг дэвсгэрт гаднын гурван иргэн усанд осолдож, амиа алдлаа. Иргэд аялал зугаалгаар явахдаа аюулгүй байдлаа бүрэн хангаж, үер, усны аюулаас болгоомжлох хэрэгтэй" гэв.