"Мөнх тэнгэрийн бичиг” уран бичлэгийн уралдаанд 8-10 дугаар ангийн сурагчдын ангилалд Хөвсгөл аймгийн Рэнчинлхүмбэ сумын наймдугаар ангийн сурагч Г.Туяацэцэг тэргүүн байр эзэлсэн билээ. Хулсан үзгээр хичээллээд гурван жил болж байгаа түүнтэй ярилцлаа.

-Уран бичлэгийн уралдаанд оролцож тэргүүн байр эзэлсэнд нь баяр хүргэе. Өмнө нь ямар амжилт гаргаж байсан бэ?

      -Би энэ жил анх удаа уран бичлэгийн уралдаанд оролцсон. Өөрийгөө тэргүүн байрт шалгарна гэж бодож, төсөөлж байгаагүй болохоор надад тэр бүхэн зүүд, зэрэглээ мэт санагдсан. Шагнал авах мөчид үнэхээр их баярлаж буйгаа мэдэрсэн. Мөн өөрийгөө хөгжүүлэх, илүү сайн суралцах итгэлтэй болж, уран зориг авсан. Багш нар болон өвөө, эмээ минь их баярласан. 

-Чи яагаад Шувуун саарал өгүүллэгийг сонгож бичсэн бэ. Д.Нацагдоржийн бүтээлүүдийг унших дуртай юу?

     -Тийм ээ. Би Д.Нацагдорж зохиолчийн зохиол, бүтээлүүдийг нь унших дуртай болохоор “Шувуун саарал”-ыг сонгосон. Гэхдээ ганцаараа шийдээгүй. Багштайгаа ярилцаж байгаад сонгосон. Тус бүтээлийн би хулсан үзгээр бичсэн. Сурагчид Д.Нацагдоржийн бүтээлүүдээр хүмүүжиж, суралцдаг гэж боддог. Би ч мөн тэдний нэг нь. 

-Хулсан үзгээр хичээллээд хэдэн жил болж байгаа вэ. Уран бичигтэн болоход нь юу хамгийн их нөлөөлсөн бэ?

     -Би хулсан үзгээр хичээллээд гурван жил болж байна. Хичээллийнхээ хажуугаар суралцдаг. Миний үеэл эгч Энхжин маань Монголын сайхан бичигтэн улсын уралдаанд олон удаа оролцож, шалгарч байсан болохоор эгчээсээ үлгэр дуурайлал авсан. Бас өөрөө бичих сонирхолтой болохоор дуртай хичээллэдэг.

-Монгол бичгээр бичихэд чамд ямар мэдрэмж төрдөг вэ?

     -Үндэсний бичгээрээ бичихэд амар амгалан, тайван мэдрэмж төрдөг. Мөн Монголоороо улам бүр бахархаж, аз жаргалтай болдог. Мөн багш минь надад тийм сайхан мэдрэмжийг төрүүлж, монгол бичгээр бичих сонирхолыг улам бүр төрүүлж өгдөг. 2025 оноос манай улс хос бичигтэй улс болох болохоор хүн бүр монгол бичгээ сурах нь чухал. Мөн дунд ангийн сурагчид монгол бичгээ сайн сурч, чөлөөт цагаараа монгол бичгээ уншиж, бичих нь монгол хүн бүрийн зайлшгүй хийх ёстой зүйл гэж бодож байна.

-Монгол бичгээр бичих авьяас билгээ цаашид хэрхэн хөгжүүлнэ гэж боддог вэ?

     -Би арванхоёрдугаар ангиа төгсөхдөө уран бичигтэн, сайхан бичигтэн зэрэг уралдаанд оролцож, МУИС-д монгол хэл, бичгийн багшаар дөрвөн жил үнэгүй суралцах эрхийн бичиг авна гэсэн зорилготой хичээж байгаа. Тэгээд монгол хэлний багш болчихоод үндэсний бичгээ түгээн дэлгэрүүлж, хойч үеэ монгол бичгийн боловсролтой болгоно гэж мөрөөддөг.

-Удахгүй улсын сайхан бичигтэн шалгаруулах тэмцээн болно. Түүнд оролцохоор төлөвлөж байгаа юу?

     -Тухайн тэмцээнд оролцохоор өөрийгөө бэлдэж байгаа. Тус тэмцээнд өөрийн зохиосон эссэгээ бичиж оролцох юм. Одоогоор эссэгээ бичих ажилд анхаарч байгаа.