Монголын үндэсний бөхийн холбооны тэргүүлэгчдийн ээлжит хурал өчигдөр буюу 2021 оны арванхоёрдугаар сарын 6-ны өдөр Монголын бөхийн өргөөнд болжээ. Тэргүүлэгчдийн хурлаар зөрчил гаргасан аймаг, сумын цолтнуудын барилдах эрхийг хасжээ.

Тодруулбал, Үндэсний бөхийн барилдааны дүрмийн 7.3-д заасны дагуу давтан допингийн зөрчил гаргасан улсын арслан Э.Оюунболдын барилдах эрхийг найман жилээр, допингийн зөрчил гаргасан аймгийн арслан Н.Батсайхан, Б.Хадбаатар, аймгийн заан Б.Уртнасан нарын барилдах эрхийг дөрвөн жилээр хассан байна.

Допинг хэрэглэж, барилдах эрхээ дөрвөн жилээр хасуулсан Б.Хадбаатартай холбогдож, Тэргүүлэгчдийн хурлаас гаргасан шийдвэртэй санал хийлж байгаа талаар тодруулахад “Асуултад хариулахгүй, тайлбар өгмөөргүй байна” гэлээ.

         Тэрбээр шинжилгээний хариу гарсны дараа манай сайтад өгсөн тайлбартаа “Монголын үндэсний бөхийн холбооноос холбогдоогүй байна. Миний шинжилгээнээс допинг илэрсэн гэдэг нь ор үндэслэлгүй, худал мэдээлэл байна. Би гэмтэлгүй байсан учир эм, тариа хэрэглээгүй. Иймд надаас допинг илрэх ёсгүй" гэж байсан юм.