"Улаанбаатар дулааны сүлжээ" ТӨХК-аас нийслэлийн дулаан хангамжийн шугам сүлжээнд хийх их засварын ажлыг энэ долоо хоногт үргэлжлүүлж байна. Үүнтэй холбогдуулан Сонгинохайрхан дүүргийн зарим хороонд халуун ус хязгаарлах түр зогсолт хийж эхэлжээ. Тодруулбал, Карьер, “Буян” ХХК, 013-р анги, Төв цэвэрлэх байгууламж, 21-р хорооллын хэсэгт зуны төлөвлөгөөт их засварын хүрээнд халуун ус хязгаарлагдаж байгаа бөгөөд уг хязгаарлалт наймдугаар сарын 12-ныг хүртэл үргэлжлэх юм. Иймд дээрх бүсэд оршин суугаа хэрэглэгч та дулааны шугам сүлжээний засварын мэдээлэл болон байршлын талаар дэлгэрэнгүй мэдээллийг “Улаанбаатар дулааны сүлжээ” ТӨХК-ийн албан ёсны вэбсайт, цахим хаягаас авах боломжтойг тус компаниас мэдээллээ.