Үндэсний ууган үйлдвэрлэгч “Мах Импэкс” ХК 79 дэх улирлынхаа нээлтийг ёслол төгөлдөр хийлээ. Энэ үеэр компанийн удирдлагууд олон жилийн турш тууштай, сэтгэл зүтгэлтэй ажилласан ажилтнуудаа үнэлж, хүндэтгэл үзүүлсэн юм. Нээлтийн арга хэмжээний үеэр тус компанийн билэгдэл болсон хүрэл хийцтэй бухын баримал, дурсгалын бэлэг болон мөнгөн шагналыг шилдэг ажилтнуудад гардуулсан байна.

Гүйцэтгэх захирал Галсангийн Бүдрагчаа хэлэхдээ “Нийт хэрэглэгчдээ хангахын төлөө чин сэтгэлээсээ хөдөлмөрлөсөн та бүхний гавьа бол бид бүхний бахархал юм” хэмээн онцолжээ.

Энэ удаа дараах ажилтнуудыг шагнаж, алдаршуулсан байна. Үүнд:

• Мах боловсруулах үйлдвэрийн По карын засварчин Нямын ДОРЖСҮРЭН
• Засварын цехийн гагнуурчин Таасамын ОЮУНБИЛЭГ
• Мах боловсруулах үйлдвэрийн лифтний засварчин Санжидын ГАН-ЭРДЭНЭ нар багтжээ.

Мах импэкс ХК 50 жилийн турш үйлдвэрлэл, үйл ажиллагаагаа тасралтгүй явуулж, дотоодын хүнсний аюулгүй байдал, экспортыг дэмжихэд үнэтэй хувь нэмэр оруулсаар ирсэн үндэсний үйлдвэрлэлийн компани билээ.