ЭРГЭЛТ.МН МЭДЭЭЛЛИЙН САЙТ ДӨРВӨН ЖИЛИЙН ОЙГОО ТОХИОЛДУУЛАН НОМЫН САНГУУД, ИХ, ДЭЭД СУРГУУЛИУДАД БҮТЭЭЛҮҮДЭЭ БЭЛЭГЛЭЛЭЭ

2024-09-09, 591

Монголын анхны “Балдорж” шагналт редакц, МСНЭ-ийн “Ган үзэг” шагналт “Оюунлаг ирээдүйн төлөө” уриатай Эргэлт.мн мэдээллийн сайтын дөрвөн жилийн ой өнөөдөр тохиож байна. Энэ өдрийг угтан бид өнгөрсөн дөрвөн жилийн хугацаанд сэтгүүлчдийнхээ эрэл хайгуул, авьяас, мэдрэмжийн үр дүнд бүтсэн бүтээлүүд болох ном, сэтгүүл, сонин зэргийг номын сангууд болон сэтгүүл зүйн чиглэлээр судалгаа хийдэг байгууллагууд, сэтгүүлч мэргэжлээр боловсон хүчин бэлтгэдэг их, дээд сургуулиудад бэлэглэлээ.

Тодруулбал, Үндэсний номын сан, Нацагдоржийн нэрэмжит Улаанбаатар хотын нийтийн төв номын сан, Хүүхдийн төв номын сан болон Хэвлэлийн хүрээлэн, Монголын сэтгүүлчдийн нэгдсэн эвлэл, Глоб интернэшнл төвд бүтээлүүдээ гардуулсан юм. Мөн сэтгүүлч мэргэжлээр боловсон хүчин бэлтгэдэг МУИС, МУБИС, СУИС, Хүмүүнлэгийн ухааны их сургууль, “Отгонтэнгэр”, “Сити” их сургуулийн номын сан болон “Ид шидийн орон”-ы долоон салбарт ном, сэтгүүлүүдээ хүлээлгэн өглөө.

Эргэлтийн сэтгүүлч, уран бүтээлчдийн өнгөрсөн дөрвөн жилийн хугацаанд уншигчдын оюуны санд өргөн барьсан бүтээлүүдийг танилцуулъя. "Монголын шилдэг нийтлэл" цуврал 99 ботийн 74 дэх боть нь Эргэлт.мн мэдээллийн сайтын эрхлэгч, “Балдорж” шагналт сэтгүүлч Э.Хүрэлбаатарын бүтээлүүдээс бүрдэх бол 88 дугаар боть нь хоёр цуврал бөгөөд манай сайтын сэтгүүлчдийн бүтээл юм.

Мөн Эргэлт.мн мэдээллийн сайт хоёр жилийн ойгоо тохиолдуулан сэтгүүлч, уран бүтээлчдийнхээ шилдгийн шилдэг бүтээлүүдийг эмхэтгэн “ЭРГЭЛТИЙН НОМЫН САН” цуврал 10 ном бүтээж, уншигчдын хүртээл болгосон. Монголын сэтгүүл зүйн салбарт өмнө нь бие даасан чөлөөт редакц нийтлэл, ярилцлага, хөрөг, тэмдэглэл, сурвалжилга тэргүүтэй бичлэгийн бүхий л төрлөөр бичсэн бүтээлүүдийг цогцоор нь багтаасан 10 ном буюу 2600 гаруй хуудас бүхий баримт, гэрэл зураг хавсаргасан бүтээлийг нэг дор хэвлүүлж, олон нийтэд хүргэж байгаагүй. Тиймээс энэхүү “ЭРГЭЛТИЙН НОМЫН САН” цуврал нь нэг редакцаас “төрсөн” бүтээлүүдийн цуврал гэдгээрээ Монголын сэтгүүл зүйн салбарт анхдагч болсон юм.

Түүнчлэн бид өнгөрсөн дөрвөн жилийн хугацаанд сэтгүүл зүйн бүтээлүүдийг баринтагласан “Эргэлт” сэтгүүлийн гурван дугаарыг эрхлэн гаргаж, уншигчдадаа өргөн бариад байна.Тун удахгүй дөрөв дэх дугаараа уншигчдадаа хүргэхээр бэлтгэж буй бөгөөд гурван жилийн ойгоор маань 40 нүүр бүхий “Эргэлт” сонин “мэндэлсэн” билээ.

Энэ ташрамд, өдөр бүр Эргэлт.мн мэдээллийн сайттай хамт байдаг уншигч, үзэгч та бүхэндээ баярлалаа.

ЭРГЭЛТ.МН МЭДЭЭЛЛИЙН САЙТ ДӨРВӨН ЖИЛИЙН ОЙГОО ТОХИОЛДУУЛАН НОМЫН САНГУУД, ИХ, ДЭЭД СУРГУУЛИУДАД БҮТЭЭЛҮҮДЭЭ БЭЛЭГЛЭЛЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.