Онцгой байдлын газраас албан хаагчдын хувцас, хэрэгслийн талаар ОБЕГ-ын Санхүү, ар талын газрын дарга, хурандаа Я.Гантөмөр мэдээлэл өглөө.

          Тэрбээр "Онцгой байдлын байгууллагын хувцас хангалтыг үндсэн гурав хуваан авч үздэг.

• Техник
• Хүн нэг бүрийн хамгаалах хэрэгсэл буюу тусгай зориулалтын хувцас хэрэглэл,
• Өдөр тутмын хувцас гэж ангилдаг.

              Онцгой байдлын хэмжээнд тоног төхөөрөмж, техникийн хангамж сүүлийн жилүүдэд харьцангуй өндөр чанартай байгаа. Бид Польш, Беларусь, Франц зэрэг улсын техникээр тоноглогдож байгаа бөгөөд улсын төсвийн "Тoyota" маркийн автомашинаар парк шинэчлэл хийгээд явж байгаа. Албан хаагчдын хамгаалах хувцас хэрэгсэл, багаж техникийн хувьд улсын төсвөөс зохион байгуулдаг. Мөн өдөр тутмын хувцас хэрэгсэл гэж байдаг. Үүнийг мөн улсын төсвөөс зохион байгуулдаг. Хувцас хэрэгсэл дээр мөрдөгддөг тусгай стандарт бий. Өөрөөр хэлбэл, галын хувцас гэхэд тэдэн градуст тэсвэртэй байх ёстой гэсэн техникийн шаардлага тавьдаг. Бид аль болох өндөр чанартай, хувцас хэрэгсэл авч болж байгаа юм. Харин энэ хэмжээгээр худалдан авах тоо хэмжээ буурдаг. Иймээс бид аль болох Монгол Улсынхаа цаг агаарт тохирсон, дээрээс нь боломжийн үнэ ханштай хувцас авахыг зорьдог юм. Жил бүр хэдэн төгрөг төсөвлөдөг эсэх нууцад хамааралтай учир нээлттэй мэдээлэх боломжгүй. Гэхдээ энэ жилийн тухайд Засгийн газар энэ чиглэлд тусгай тогтоол гаргаж 15 тэрбум төгрөгийг суулгаж өгсөн. Бид энэ дагуу худалдан авалтаа хийнэ" гэв.