Эрүүл мэндийн яамнаас цаг үеийн асуудлаар мэдээлэл хийлээ. 2020 оны арванхоёрдугаар сарын 10-нд нийт 20633 хүнд PCR шинжилгээ хийхэд долоон хүнээс вирус илэрчээ. Тодруулбал, Улаанбаатар хотод зургаан тохиолдол бүртгэгдсэн байна. Эдгээр тохиолдол нь өмнө нь батлагдсан тохиолдлын ойрын хавьтал байсан. Үүний нэг нь Амгалан гаалийн газрын ажилтны тандалтын шинжилгээнээс вирус илэрсэн байна. Түүний хүүхдээс нь мөн илэрчээ. Сэлэнгэ аймагт нэг тохиолдол илэрсэн бөгөөд мөн батлагдсан тохиолдлын ойрын хавьтал байсан гэв.

Улаанбаатар хотын нийт өвчлөл 138, Сэлэнгэ аймагт 208 байна.

Улсын хэмжээнд дотоодод батлагдсан тохиолдол 454 болжээ. Монгол Улсад бүртгэгдсэн нийт халдварын тоо 905 болсон бөгөөд үүнээс 384 нь эдгэрсэн. Өнөөдрийн байдлаар эмчилгээнд байгаа 512 хүний биеийн байдлыг үнэлбэл, маш хүнд нэг, хүнд тав, хүндэвтэр 76, хөнгөн 430 байна.