Эрх мэдэл, албан тушаалаа урвуулан ашиглаж, бусдаас их хэмжээний хахууль авч, мөнгө угаах гэмт хэрэгт холбогдон шалгуулж буй Т.Бадамжунайгийн хэрэгт УИХ-ын гишүүн Ц.Анандбазар, “Улаанбаатар цахилгаан түгээх сүлжээ” ТӨХК-ийн захирал асан, Дулааны цахилгаан станцын дарга асан нарыг холбогдуулан шалгаж, хэргийг нь прокурорт шилжүүлжээ. Тодруулбал, УИХ-ын гишүүн Ц.Анандбазар Т.Бадамжунайг Улаанбаатар хотын менежерээр ажиллаж байхад Дархан цаазат Богдхан уулын Бага тэнгэрийн аманд газар авахаар их хэмжээний хахууль өгсөн байж болзошгүй талаар эх сурвалж мэдээллээ.

Засгийн газраас хэрэгжүүлж байгаа "Шувуу" ажиллагааны хүрээнд Филиппин Улсаас авчирч, шалгаад буй УИХ-ын гишүүн, ХХААХҮ-ийн сайд асан Т.Бадамжунай нийслэл хотыг таван жил удирдахдаа Зайсан толгойн урдах газрыг УИХ-ын гишүүн Д.Өнөрболорт, Маршалын гүүрний ардах газрын "Чингис хаан" банкны эзэн Д.Батаа зэрэг дотнын, харилцаа, хамаарал бүхий хүмүүстээ баруун, солгойгүй тараасан гэдэг. Нэгэн үе дунд нь "нэр цохиж" явсан УИХ-ын гишүүн Ц.Анандбазар өдгөө Бага тэнгэрийн аманд 160 айлын тансаг зэрэглэлийн хаус, 172 айлын орон сууц барьж, түүнийгээ хэдийнэ борлуулчихсан. Тиймээс Ц.Анандбазарыг Бага тэнгэрийн аманд тансаг зэрэглэлийн хаус, хороололтой болгосон эх үүсвэрүүдийнх нь нэг Т.Бадамжунай байж болзошгүй талаар эх сурвалж хэлж байна.

                     Тиймээс түүнийг Филиппин Улсаас "шувуу" ажиллагаагаар “шүүрч” авчираад шалгаж байгаа хэргүүдэд нь УИХ-ын гишүүн Ц.Анандбазар тэргүүтэй гурван хүнийг холбогдуулан шалгасан болгоод олон хэргийг нь нэг хэргээр хаах төлөвлөгөөтэй байгаа гэх. "Шувуу" ажиллагаагаар шалгагдаж байгаа Т.Бадамжунайд холбогдоогүй хулгай, хийгээгүй  хэрэг гэж үгүй. Тэрбээр газрын хулгай, ЖДҮ, албан тушаалын наймаа, Хөгжлийн банкны хэрэг, нүүрсний хулгайд шил дараалан холбогдож, гэмт хэргүүдийг ар араасаа дагуулсан нэгэн. Тухайлбал, 2008 онд ХХААХҮЯ-ны сайдаас буусныхаа дараа яамныхаа хэдэн дүү нартайгай ЖДҮХС-ийн 500 сая төгрөгийг нэр бүхий 108 иргэн, компанийн данс руу шилжүүлж, МАН-ынханд ЖДҮ-гийн зээлийг тараасан ч хэрэг нь удалгүй намжсан гэдэг. Мөн эрх мэдэл, албан тушаалын томилгоог тэр мэдэж, улс төрийнх нь замналыг зурж өгсөн гэцгээдэг. Түүнийг дагаж, дуурайж, гуйж байгаад гишүүн болчихсон нь ч бий. Үүнээс гадна сүүлийн үед олныг шуугиулаад буй нүүрсний хулгай, хөгжлийн банкны гэх хоёр томоохон хэрэг бий. Үүнд ч тэрбээр улс төрд оруулсан дүү нартайгаа цуг холбогдоод байгаа юм. Иймээс Т.Бадамжунай МАН-ынхны томоохон хэргүүдийг атгалцаж, гэмт хэрэгтний дүрд чимээгүйхэн нуугдаж байгаа.