Тулгар төрийн 2232 жил, Их Монгол Улсын 817 жил, Үндэсний эрх чөлөө тусгаар тогтнолоо сэргээн мандуулсны 112 жил, Ардын хувьсгалын 102 жилийн ой, Үндэсний их баяр наадмын хүчит 512 бөхийн барилдааны долоогийн даваа өндөрлөлөө. Даян аварга Н.Батсуурьтай барилдаж, идэхийн дүрмээр хасагдсан улсын арслан Ц.Содномдорж мэдээлэл өглөө.

   Тэрбээр “Ном журмаараа л боллоо. Цаг болсон гэж хэлсэн. Уг нь барилдсан бол сайхан байлаа. Дүрэм бол дүрэм олонхын саналаар шийдсэн гэлээ. Угаасаа нэг нь давах учраас барилдсан бол болох байсан. Зах дээр эхний сэрүү барьцаас нэлээд түрж гаргасныг үндсэндээ идэвхгүй гэж үзсэн. Барьц дээр бол би идэвхгүй барьц аваагүй. Аварга сүүлийн 20 минутад барьц задалсан” гэв.