УИХ-ын гишүүн Б.Пүрэвдорж, Ж.Батсуурь, А.Адъяасүрэн  нар "Эрдэнэт үйлдвэр"-ийн 20 хувийг иргэдэд эзэмшүүлж, 20 хувийг худалдах тогтоолын төсөл өргөн барилаа. Төслийн талаар УИХ-ын гишүүн А.Адъяасүрэн мэдээлэл хийлээ.

Тэрбээр “Байгалын баялаг ард түмний мэдэлд байна гэж ярьдаг. Хуучин гурван хүн тутмын нэг нь ядуу байна гэдэг байсан. Гэтэл одоо хоёр хүн тутмын нэг ядуу байгаа гэдэг тоон мэдээлэл байна. Бид байгалийн баялаг ихтэй хэрнээ яагаад ингэж ядуу байгаад байгаа юм. Ийм учраас бид энэ хуулийн төслийн санаачилсан. “Эрдэнэт үйлдвэр"-ийн жилийн ашиг нэг их наяд төгрөг байдаг. Үүнийг тооцоод үзвэл компани, ААН-д дөрвөн сая төгрөгийн ноогдол ашиг, хувь хүнд 80 мянган төгрөг, дөрвөн ам бүлтэй айл байлаа гэхэд жилдээ 360 мянган төгрөгийн ашиг хүртэнэ гэсэн эдийн засгийн тооцоо гаргасан. Өнөөдөр Монгол Улсад ядуурал дээд цэгтээ хүрсэн байна. Баялаг бүтээгчид бүрэн дүүрэн үйл ажиллагаагаа явуулж чадахгүй байгаа. Ийм учраас эхний алхам бол байгалийнхаа баялгийг ард түмэнд хүртээх ёстой” гэв.