ХБНГУ-ын Олон улсын хамтын ажиллагааны нийгэмлэг (GIZ)-ээс “Азийн орнуудад хүртээмжтэй даатгалын зах зээлийг хөгжүүлэхэд зохицуулалтын байгууллагын оролцоо”  хөтөлбөрийг хэрэгжүүлэхэд үнэтэй хувь нэмэр оруулсан хэмээн  Санхүүгийн зохицуулах хороонд талархлын цом гардууллаа.

      Тус нийгэмлэгээс даатгалын хүртээмжийг нэмэгдүүлэх, хүртээмжтэй даатгалын зохицуулалтыг сайжруулах зорилгоор дээрх хөтөлбөрийг долоон улсад хэрэгжүүлсний нэг нь Монгол Улс юм. Хөтөлбөрийн “Бүс нутгийн удирдах зөвлөл”-ийн гишүүнээр Санхүүгийн зохицуулах хороо ажиллахын зэрэгцээ хөтөлбөрт хамрагдсан улс орнуудын санал солилцох уулзалтыг Улаанбаатар хотноо зохион байгуулж байсан. Мөн хөтөлбөрийн хүрээнд дотоодын хүртээмжтэй даатгал болон түүнд тавигдах шаардлагыг тодорхойлж, даатгалын бүтээгдэхүүний судалгаа, зохицуулалтын орчны үнэлгээг хийсэн. Ингэснээр даатгалын компаниудын хүртээмжтэй даатгалын бүтээгдэхүүн борлуулах сонирхол дээшилж,  даатгалын бүтээгдэхүүнүүдийн тоо ч нэмэгдсэн. Тодруулбал, даатгалд хамрагдах боломж хязгаарлагдмал хэрэглэгчдэд хүргэх борлуулалтын сувгийг нэмэгдүүлэх, болзошгүй эрсдэлээс урьдчилан сэргийлэхэд чиглэсэн даатгалын бүтээгдэхүүн, үйлчлүүлэгчдийн хэрэгцээ шаардлагад нийцсэн үйлчилгээг нэвтрүүлэхэд анхаарч ажилласан юм.

       Филиппин Улсын Манила хотноо болсон хаалтын арга хэмжээний үеэр ийнхүү хөтөлбөрийг амжилттай хэрэгжүүлэхэд үнэтэй хувь нэмэр оруулсан хэмээн цом гардуулсан байна