Хаан банкны ажилтан ажлын байрнаасаа 360 сая төгрөг аваад зугтсан хэрэг энэ сарын 19-ны өдөр цагдаагийн байгууллагад бүртгэгджээ. Энэ талаар цагдаагийн ерөнхий газрын хэвлэл мэдээллийн албанаас тодруулахад "Цагдаагийн байгууллагад энэ оны 12 дугаар сарын 19-ний өдрийн 18:15 минутад Сүхбаатар дүүргийн наймдугаар хорооны нутаг дэвсгэрт байрлах банкинд “манай ажилтан касснаас 100 мянган ам.доллар хулгайлаад явсан байна” гэх дуудлага, мэдээлэл бүртгэгдсэн. Дуудлага, мэдээллийг тус дүүргийн цагдаагийн газрын нэгдүгээр хэлтсээс шалгахад тус банкинд ажилдаг 27 настай, эрэгтэй “З” гэгч нь энэ оны аравдугаар сарын 28-наас 12 дугаар сарын 06-ны хооронд хуурамч гүйлгээгээр нийт 360 сая төгрөгийг завшсан байж болзошгүй хэрэгт мөрдөн шалгах ажиллагаа явуулж байна" гэв.