АТГ-ын дарга З.Дашдаваагаас нүүрсний хулгайн асуудлаар мэдээлэл өглөө. Тэрбээр “Нүүрсний хэрэгт холбогдуулан 3000 орчим хүн байцааж,  70 орчим объектод нэгжлэг хийж, 34 эд хөрөнгө битүүмжилсэн байна. АТГ-аас эхний ээлжинд шалгах улс төрд нөлөө бүхий гэж үзсэн 17 хүнийг олон нийтэд зарлаж, шалгалтын ажиллагааг эхлүүлсэн. Цаашид улс төрд нөлөө бүхий хэчнээн хүн зарлахыг мэдэхгүй байна. Бид энэ жил Хөгжлийн банкны 94 холбогдогчтой хэргийг шалгаж, прокурорын байгууллагад шилжүүлсэн. Үүний үр дүнд 899 тэрбум төгрөгийн хохирлыг барагдуулсан. Тиймээс нүүрсний хэргийг иргэдийн шаардлагаар шуурхай шалгаж, ямар нэгэн этгээдэд давуу байдал олгож, ял завшуулахгүйгээр хэргийг шийдвэрлэхээр ажиллаж байна. Бид өөрсдийн цуглуулсан нотлох баримтад үндэслэж 17 хүнийг шалгаж, яллагдагчаар татах эсэхийг прокурорын байгууллага руу шилжүүлнэ. УИХ-ын таван гишүүнийг бүгдийг нь дуудаж, байцаасан. Хүний гэм буруугийн асуудлыг тогтоохын тулд цаг хугацаа хэрэгтэй. 80 орчим мөрдөгчийн бүрэлдэхүүнтэй бүгдийг нь шалгаж байгаа. Жолооч нараас тайлбар, мэдүүлэг авч байгаа. Тэднийг нүүрс хулгайлсан гэж үзэж байгаа юм биш” гэлээ.