Үндэсний аюулгүй байдлыг хамгаалах, хууль сахиулах тусгайлсан чиг үүрэгтэй төрийн цэргийн болон цэрэгжсэн байгууллагуудын дунд жил бүр болдог Монгол Улсын Ерөнхийлөгчийн нэрэмжит практик буудлагын тэмцээн Монголын практик буудлагын холбооны төв клубийн буудлагын талбайд хоёр өдөр үргэлжилж, шилдгүүдээ тодрууллаа. Онцгой байдлын ерөнхий газар, “Практик буудлагын холбоо” хамтран зохион байгуулсан тус тэмцээнд 13 байгууллагын 180 гаруй тамирчид, мэргэн буучид цэц мэргэнээ сорин өрсөлдсөн юм. Тэмцээний хаалтын ажиллагаанд Үндэсний аюулгүй байдлын зөвлөлийн нарийн бичгийн дарга Ж.Энхбаяр оролцож энэ удаагийн практик буудлагын тэмцээн нь зохион байгуулалтын хувьд маш сайн болсон төдийгүй оролцогч байгууллагуудын хамтын ажиллагаа, тамирчдын ур чадварыг дээшлүүлэхэд өндөр ач холбогдолтой тэмцээн боллоо гэж онцоллоо.

           Ингээд тэмцээний дүн гарахад Карабины опен ангилалд нэгдүгээр байрт Хил хамгаалах ерөнхий газрын тамирчин Б.Соронзонболд, дэд байрт Онцгой байдлын ерөнхий газрын тамирчин Б.Дэлгэрсайхан, гутгаар байрт Тагнуулын ерөнхий газрын тамирчин  Э.Үнэнхүү, Карабины стандарт ангилалд нэгдүгээр байрт Цагдаагийн ерөнхий газрын тамирчин Ж.Баттулга, дэд байр мөн ЦЕГ-ын тамирчин О.Баттөгс, гутгаар байр Төрийн тусгай хамгаалалтын газрын тамирчин  Б.Жагдаг, Гар бууны сумтай автомат ГСК эрэгтэй төрөлд нэгдүгээр байрт Төрийн тусгай хамгаалалтын газрын тамирчин А.Лхагвасүрэн, дэд байрт Цагдаагийн ерөнхий газрын тамирчин Ш.Ариунбаяр, гутгаар байрт Зэвсэгт хүчний жанжин штабын тамирчин Л.Пүрэвсүрэн,

          Монголын практик буудлагын холбооны төв клубийн буудлагын талбайд зохион байгуулагдсан тус тэмцээн нь төрийн цэргийн болон хууль сахиулах байгууллагын алба хаагчдын хурд, хүч, авхаалж самбаа, цэц мэргэнийг сорихоос гадна тэдний ур чадварыг дээшлүүлэх, хамтын ажиллагааг өргөжүүлэх, харилцан туршлага солилцох, буудлагын тамирчдын залуу халааг бэлтгэж цэрэг-эх оронч үзлийг төлөвшүүлэхэд дэмжлэг үзүүлсэн ач холбогдол өндөртэй тэмцээн болж өнгөрлөө гэж Онцгой байдлын ерөнхий газраас мэдээллээ.