Дорноговь аймгийн Мандах сумын Богдын хошуун хонд гэх газарт “Түмэн айл инвест” компани нүүрс олборлохоор эхлүүлж буй. Харин нутгийн иргэд компанийн үйл ажиллагааг эсэргүүцэж байгаа илэрхийлсэн. Гэтэл тус компанийнхан малчдад хүч хэрэглэж, гарыг нь мушгиж, хүлж танхайрсан бичлэг олон нийтийн сүлжээнд цацагдсан. Энэ талаар сумын Засаг дарга Б.Угтахбаяраас тодрууллаа. 

    Тэрбээр “Түмэн айл инвест” компанийнхан малчдад гар хүрсэн гэх маргаан энэ сарын 9-нөөс эхэлсэн. Тус нүүрсний компани нь манай сумын хоёр, гуравдугаар багийн заагт оршдог тахилгатай уулын ойролцоо үйл ажиллаагаа эхлүүлэхээр төлөвлөж байгаа. Тийм учраас малчдын дийлэнх нь тус үйл ажиллагааг эсэргүүцэж байгаа юм. Тус компани манай суманд 2014 оноос хойш хайгуулын үйл ажиллагаагаа эхлүүлсэн. Харин одоо олборлох зөвшөөрлөө авчихсан, бичиг, цаасны ямар ч асуудалгүй гэсэн. Аймгийн Засаг даргаар ахлуулсан ажлын хэсэг манай суманд ирсэн. Бид “Түмэн айл инвест” компанийн байршиж буй газарт ажиллахаар явж байна. Тиймээс дээрх маргаантай асуудлыг мэргэжлийн байгууллагынхан шийднэ" гэв.