Баянзүрх дүүргийн 55 дугаар сургуулийн Газар зүйн багш Х.Сувдаа 11 сая 817 мянган төгрөгийн төсөл бичиж газар зүйн кабинеттай болсон байна. Түүнээс  кабинетаа хэрхэн тохижуулсан талаар тодрууллаа.

-Кабинет тохижуулах санааг хэзээ гаргасан бэ. Төсөв нь хаанаас батлагдсан бэ?

    -Би 55 дугаар сургуульд 23 дахь жилдээ багшилж байна. "Хүүхдүүдэд зориулсан газар зүйн кабинеттай болох юм сан" гэж олон жил хүсэж, мөрөөдөж байлаа. Хоёр жилийн өмнө төсөл бичээд олон байгууллагуудтай хамтарч ажиллахаар хөөцөлдсөн. Гэвч цар тахлын улмаас нааштай хүлээж авах газар цөөн байлаа. Харин "Цубука" компани санал хүсэлтийг минь хүлээн авч, сургуультай маань танилцаад 11 сая 817 мянган төгрөгийн хөрөнгө оруулалтаар төслийг дэмжсэн.

-Хэдий хугацаанд кабинетаа тохижуулсан бэ?

     -Хоёр сарын хугацаанд тохижуулж энэ сарын 9-нд албан ёсоор нээсэн. Хуучин манай сургуульд албан ёсны газар зүйн кабинет байгаагүй. Багш нар сургалтын хэрэглэгдэхнүүдтэй ангиудад хичээл ордог байсан. Сургалтын хэрэглэгдэхүүн зардаг дэлгүүрүүдэд хил хаасантай холбоотойгоор хичээлийн хэрэглэгдэхүүн дутмаг байна. Хил нээгдэхээр танхимаа илүү сайхан болгож тохижуулахаар төлөвлөж байгаа. Манай сургуульд хөгжлийн бэрхшээлтэй хүүхдүүд суралцдаг онцлогтой учраас багш нь хүүхдүүддээ хэлж, заагаад өнгөрөх биш. Тэдэнд аливаа зүйлийг биетээр үзүүлж, харуулж, мэдрүүлж хичээл заавал илүү үр дүнтэй байдаг. Тийм учраас заавал кабинеттай болохыг  хичээсэн.

-Танай сургуулийн хүүхдүүд маш их баярлаж байгаа байх. Хүүхдүүд нь танд урмын үг хэлсэн үү?

     -Хүүхдүүд маш баяртай байгаа. Хоёр өдөр кабинетад хичээллэсэн. Тэр үед хүүхдүүдийн сэтгэл хөөрч, баяртай, хичээлдээ дуртай болж байгаа нь мэдрэгдсэн. Хүүхдүүдийн баярлаж байгааг харах сайхан байлаа. Мөн эцэг, эхчүүд цахимаар баяр хүргэж, урмын үг хэлсэн. Одоо ч тасраагүй баярлаж, талархаж байгааг илэрхийлсээр байна. Ирэх нэг дэх өдрөөс орон даяар цахимаар хичээллэж байгаа. Тийм учраас хүүхдүүд танхимд хичээллэхийг тэсэн ядан хүлээх байх.

-Тус кабинетад хэчнээн хүүхэд хичээллэх вэ?

    -6-12 дугаар ангийн 260 гаруй хүүхэд газар зүйн танхимд хичээлээ үзнэ.

-Газар зүйн кабинетыг тохижуулах санааг яаж олсон бэ?

    -Энэ хугацаанд сургуулийн багш нар, хамт олон минь их тусалсан. Сургуулийн удирдлагуудтай ярьж ойлголцоод тохижуулах санаагаа нэгтгэсэн.

-Газар зүйн кабинеттай болох мөрөөдлөө биелүүлсний дараа танд ямар мэдрэмж төрсөн бэ?

   -Үнэхээр сайхан, сэтгэл хангалуун байна. Сайхан орчинд ажиллаж, хүүхдүүдэд мэдлэг түгээх сайхан байна. Ажиллах урам, зориг нэмэгдсэн. Хөгжлийн бэрхшээлтэй хүүхдүүдийг сайхан орчинд сурч, хүмүүжихэд тусалсан хүмүүст дахин баярлалаа.