Эргэлт.мн мэдээллийн сайт “Дотуур байранд амьдардаг хүүхдүүдийн эрх зөрчигддөг үү” сэдэвт хэлэлцүүлэг зохион байгуулж байна. Уг хэлэлцүүлэгт Боловсрол, соёл, шинжлэх ухаан, спортын яам, Хөдөлмөр, нийгмийн хамгааллын яам, Хүний эрхийн Үндэсний Комисс болон төрийн бус байгууллагуудын төлөөлөл оролцож байна.

          “Дотуур байранд амьдардаг хүүхдүүдийн эрх зөрчигддөг үү” хэлэлцүүлгийн үеэр хуульч Р.Булгамаа "Монгол Улсад хүүхдийн эрхийг хамгаалахтай холбоотой 10 гаруй хууль, 50 гаруй стандарт, зохицуулалт байдаг. Эдгээр хууль, зохицуулалтын бүтцийг харахад харьцангуй өргөн хүрээнд хийсэн ч, огт хөрсөн дээрээ бууж, хэрэгждэггүй.

Монголд хүүхдийн эрхийн төлөөх олон зөвлөл, хороо байдаг ч ажлаа хийж чаддаггүй.

          Монгол Улсын Ерөнхий сайдаар ахлуулсан Хүүхдийн эрхийн Үндэсний зөвлөл байдаг. Жилээс жилд хүүхдийн эрх ноцтой зөрчигдөж, жилд 10 мянган хүүхдийн эрх зөрчигдсөний улмаас 100 хүүхэд нас барах эрсдэлтэй байдаг. Гэтэл үүнд анхаарч ажилладаггүй.

          Мөн Засаг дарга нарын дэргэдэх Хүүхдийн хамтарсан баг ажиллаж, ийш тийш нь явж чадахгүй нэгжний мөнгө яриад л сууж байдаг. Би үүнд хүүхдийн эрхийг хамгаалах мэргэжлийн хүн байдаггүй шүүмжилмээр санагддаг.

          2.5 тэрбум төгрөгийн санхүүжилтээр аймаг, сумдын цагдаагийн байгууллага хүүхдийн байцаагч гэх мэргэжлийн хүнтэй болсон. Төрийн байгууллагын энэ данхар бүтцийн хажуугаар боловсролын салбарынхан хүүхдийн төлөө нүд, чих болж байх ётой.

          Тэр хүмүүс хүүхдийн эрхийг хамгаалахын төлөө хүүхдийн сэтгэцэд өөрчлөлт орох, бие махбодид гэмтэл илэрснийг ажиглаж, хүүхдийн төлөө байх хэрэгтэй. Гэхдээ тэр хүмүүс үүргээ биелүүлж чадаагүй, хөндлөнгийн хяналт, шалгналт байхгүй байгаагийн хор, хөнөөл нь ингэж гарч байна” гэв.