Монгол Улсын Ерөнхийлөгч баяр наадмын босгон дээр салбартаа тэргүүлсэн эрхмүүдэд шагнал гардууллаа. Энэ үеэр МҮОНРТ-ийн нэвтрүүлэгч Ч.Ичинхорлоо Соёлын гавьяат зүтгэлтэн цол хүртлээ.   

    Тэрбээр “Монголын хэвлэл мэдээллийн салбарт 30 гаруй жил ажиллаж байна. Монголын үндэсний олон нийтийн радио телевиз гэсэн босго өндөр, авшиг шингэсэн газартай амьдрал, хувь заяагаа холбоод 27 жил болж байна. Тэгээд энэ баярт мэдээг сонсоод их сандардаг юм билээ. Энэ жил Монгол телевиз үүсгэн байгуулагдаж, өрхөө татсаны 55 жилийн ой, радиогийн 88 жилийн тэгш ой тохиох үед энэ сайхан шагналаар шагнагдсандаа баяртай байна. Юуны өмнө мянга мянган үзэгчид, телевизийнхээ алтан цамхаг, энэ их хувь заяаг олгосон ээж, аавдаа чин сэтгэлээсээ талархал илэрхийлье. Мөн МҮОНРТ-ийн үе үеийн ажилтан, албан хаагчдад хамгийн сайн сайхан бүхнийг хүсэн ерөөе” гэв.