Японы Шизүока мужийн Изүнокүни хотын өсвөрийн жүдо бөхийн тэмцээнд Монголын баг тамирчид оролцов. Монгол Улсаас Япон Улсад сууга Элчин сайдын зөвлөх А.Дэлгэрмаа арванхоёрдугаар сарын 14-ний өдөр Шизүока мужийн Изүнокүни хотоос зохион байгуулагдсан өсвөрийн жүдо бөхийн тэмцээнд мэндчилгээ дэвшүүлж, шагнал гардуулж оролцсон байна.

    Монгол Улсын Улаанбаатар хотын Сонгинохайрхан дүүрэг, Шизүока мужийн Изүнокүни хоттой эгч дүү хотын хамтын ажиллагааны хүрээнд зохион байгуулагдсан энэ удаагийн тэмцээнд “Монголын жүдо бөхийн академи”-аас өсвөрийн арван тамирчин өрсөлдөв.

     Изүнокүни хотоос арван дахь жилдээ зохион байгуулж буй энэ удаагийн тэмцээнийг Монгол Улсаас Япон Улсад суугаа Элчин сайдын нэрэмжит цомийн төлөөх тэмцээн болгосонтой холбогдуулан багийн төрөлд тэргүүн байр эзэлсэн Хамамацү хотын “Икүсэйкан” клубийн тамирчдад Элчин сайдын нэрэмжит цом, өргөмжлөлийг гардуулав.

   Тус тэмцээнд оролцсон “Монголын жүдо бөхийн академи”-ийн баг тамирчид багийн барилдаанд мөнгөн медаль хүртэв. Харин хувийн төрөлд алтан медалийг М. Төгөлдөр, И. Тэлмүүн, З. Буянравших нар, хүрэл медалийг А. Ачитбилэг, Ө. Далайбулаг, А. Алтангэрэл нар тус тус хүртсэн амжилт үзүүллээ.