Монголын үндэсний олимпын хорооны гүйцэтгэх зөвлөлийн гишүүдийн хурлаар Монгол Улсын хөдөлмөрийн баатар, Монгол Улсын гавьяат тамирчин, зэвсэгт хүчний “Алдар” спорт хорооны дарга Гэлэгжамцын Өсөхбаярт “Алтан-Од” одонг олгох шийдвэр гарсан билээ.

   Уг шагналыг өчигдөр Олон улсын олимпын хорооны гишүүн, МҮОХ-ны ерөнхийлөгч Б.Баттүшиг гардуулан өгч, хүндэтгэл үзүүллээ. Гэлэгжамцын Өсөхбаяр нь 2002,2003, 2005, 2009 онд улсын баяр наадамд түрүүлж, чөлөөт бөхийн спортоор Афины зуны олимпын наадам, дэлхийн аварга шалгаруулах тэмцээнд эх орноо төлөөлөн өрсөлдөж явсан.

    Ази тивийн аварга, Азийн наадмын хүрэл, олон улсын томоохон тэмцээнд өндөр амжилт гаргасан гавьяатай эрхэм билээ. Мөн түүний хувьд өдгөө “Алдар” спорт хороог удирдан ажиллаж яваа. Зэвсэгт хүчний “Алдар” спорт хорооноос сүүлийн дөрвөн олимпын наадамд 45 тамирчин өрсөлдсөн ба олимпын наадмын найман медальт тамирчинтай, 15 спортын багийг тогтмол барьж ажилладаг юм.