Хүн төрөлхтний бүтээсэн хосгүй гайхамшигт нүүдэлчин өв, соёлыг нэгэн дор цогцлоосон "Нүүдэлчин” дэлхийн соёлын фестиваль өнөөдөр эхэлж байна. Монгол орны нутаг, нутгийн өв соёлтой танилцан, олон улсын төлөөллийн отог өртөөгөөр зочлон, язгуур урлагийн тоглолтыг шимтэн сонирхох боломж нээгдэж байна. Үндэсний уламжлалт хоол идээ хүртэж, соёлын бүтээлч үйлдвэрлэлийн үзэсгэлэн худалдаагаар саатан сонирхох боломж байна. Мөн үндэсний спортын төрөл бүрийн арга хэмжээ, үдшийн цэнгүүн, нэгдсэн гала тоглолт зэрэг олон арга хэмжээнүүд гурван өдрийн турш үргэлжлэх болно.