Жүдо бөхийн өсвөр үеийн УАШТ-ий алт, мөнгө, хүрэл медальт, “Монголын жүдо академи”-ийн шилдэг тамирчид болох У.Энх-Учрал, У.Мөнх-Учрал нар  Япон Улсад амьдарч, суралцаж байгаа билээ. Жүдо бөхийн эрдэм ухаанд гүнзгийрэн боловсорч байгаа ихэр ах дүүс маань 2023 оны гуравдугаар сард дунд сургуульд суралцахаар “Наран улс”-ыг зорьсон юм.

        Тэгвэл энэ сарын 26-ны өдөр Япон Улсын Фүкүока мужид зохион байгуулагдсан "Sanix" олон улсын өсвөрийн багийн тэмцээнд У.Энх-Учрал, У.Мөнх-Учрал нар сургуулиа төлөөлөн амжилттай оролцлоо. Залуу тамирчид маань дэлхийн хошой аварга Жоширо Марүяамагийн аав Кэнжи Марүяамагийн удирдлага, чиглэл дор бэлтгэл сургуулилтаа хийж байгаа юм.

          Одоо 58 настай Кэнжи Марүяама багшийн хувьд 1991 оны Ази тивийн аваргад түрүүлж, 1992 оны Олимпод долдугаар байр эзэлж байсан туршлагатай шилдэг мэргэжилтэн билээ. Энх-Учрал, Мөнх-Учрал нарын хувьд анх 2018 онд "Монголын жүдо академи"-д элсэн орж тамирчны гараагаа эхлүүлсэн. 2021 оны өсвөр үеийн УАШТ-ээс тэд ах Мөнгөн-Учралынхаа хамт гурван алтан медаль хүртэж бахархам болоод өвөрмөц нэгэн амжилтыг тогтоож байсан юм.