Аргентины алдарт тоглогч Лионель Месси 17 жил хүчин зүтгэсэн Испанийн хөл бөмбөгийн “Барселона” клубээсээ гарахаар болжээ.  Энэ талаар “Барселона” клубын хэвлэлээс “Лионель Месси санхүү болон бүтцийн асуудлаас болж Барселона клубыг орхихоор боллоо” гэсэн байна.

Өдгөө 34 настай Лионель Мессигийн “Барселона” клубтэй байгуулсан гэрээ өнгөрсөн долдугаар сарын 1-нд дуусаж, чөлөөт агент болоод байсан юм. Эх сурвалжийн мэдээлснээр Лионель Месси клубтэйгээ дахин урт хугацааны гэрээ хийхийн тулд цалингаа бууруулж, авах тухай хэлэлцсэн ч “Барселона” клуб бусад тоглогчоо зарах шаардлагатай болсон аж.

Лионель Месси хөл бөмбөгийнхөө замналд Ла Лигийн аваргын цомыг 10 удаа, Аваргуудын лигийн дөрөв, Копа дер Рэйсийн долоон цомыг өргөж, оны шилдэг хөл бөмбөгчид олгодог “Алтан бөмбөг”-ийн эзнээр зургаан удаа тодорч байв. Тэрбээр “Барселона” клубын төлөө 17 жил зүтгэхдээ багийнхаа төлөө 778 тоглолтод оролцож, 672 гоол оруулсны 120-ийг нь Аваргуудын лигийн тоглолтод оруулсан дээд амжилт үзүүлсэн. Аргентины домогт тамирчин Лионель Месси 13 настайдаа “Барселона” клубын харьяа Ла Масия академид суралцаж, 2004 онд 16 настайдаа “Барселона” клубын төлөөх анхны тоглолдоо оролцож байсан билээ.

Эх сурвалж: BBC