Засгийн газрын хуралдаанаас гаргасан шийдвэрийг танилцуулж байна.

     Нийтийн тээвэртэй холбоотой асуудлаар Улаанбаатар хотын захирагч Д.Сумъяабазар мэдээллээ.

      Тэрбээр “Өнөөдрийн Засгийн газрын хуралдаанд  яаралтай асуудал хэлэлцэх шуурхай үүрэг чиглэлийг Монгол Улсын Засгийн газар танилцуулж, асуудлаа шийдэж явсан. Үүнтэй холбоотойгоор нийслэл Улаанбаатар хотын зүгээс тодорхой танилцуулгыг хийлээ. Нийт 1200 орчим тээврийн хэрэгсэл, төр, хувийн хэвшлийн нийтийн тээврийн хэрэгсэл үйлчилгээнд явж байгаа. Улаанбаатарт нэн шаардлагатай тээврийн хэрэгслийн парк шинэчлэлийг хоёр үе шаттайгаар хийж хэрэгжүүлэх үүрэг чиглэл өгсөн. Энэ хүрээнд өнгөрсөн 2021 оны улсын төсөвт бид нийтийн тээврийн хэрэгслийг шинээр суулгаж явсан, мөн ковидын эдийн засгийн хүндрэл, тээврийн гацалт зэргээс хойшилсон асуудал бий. Тэгэхээр энэ жилийн хувьд сарын хугацаанд 70 автобус болон 75 хүүхдийн автобус татаад үйлчилгээнд явуулах байгаа юм. Өнөөдрийн байдлаар хотын нийтийн тээврийн хэрэгцээ, хангамжийг стандартын түвшинд барих шаардлагатай автобусны тоо 1430 байна.

   Улаанбаатар хотод өнөөдөр ашиглалтаас татгалзах тээврийн хэрэгслийн тоо 975 байна. Эдгээр автобусыг үе шаттайгаар шинэчлэх үүрэг даалгавар өгсөн. Хотын зүгээс парк шинэчлэлийн үеийн асуудал буюу 591 автобусыг эдийн засаг болон төр, хувийн хэвшлийн түншлэлийн хүрээнд зохицуулж, оруулахаар бэлдсэн. Энэ нь мэдээж хоёр жилийн хугацаанд тодорхой зээлийн их үүсвэрээр төлж, барагдуулах чиглэлтэйгээр ажлаа уялдуулаад явж байгаа.

2022 он 590, 2023 онд 299, 2024 онд  86 гээд нийт 975 орчим тээврийн хэрэгсэл шинэчлэх зайлшгүй шаардлагатай байгаа. Үүнийгээ бид хоёр үе шаттай хуваагаад 591 автобусыг бид наймдугаар сарын 2-ны дотор татан авах ёстой гэдэг үүрэг даалгаврыг хариуцсан удирдлага өгсөн” гэв.