Мьянмарын ард иргэд ардчилал, эрх чөлөөгөө хамгаалахын тулд өнгөрсөн хоёрдугаар сарын 1-ээс хойш тасралтгүй тэмцэж буй. Эсэргүүцлийн жагсаалд оролцсон олон хүний амь үрэгдэж, гэмтэж бэртээд байгаа билээ.

Тэгвэл өнөөдөр дахин дөрвөн хүн буудуулж, амиа алджээ. Энэ талаар нэрээ нууцалсан жагсагч Ройтерс агентлагт "Цэргийн хүчнийхэн шууд буудаж, тэсрэх бөмбөг шидэн, галаа зогсоосонгүй. Бид түргэн зугтаж, халхавч хийж амжсан ч миний урдах хүн толгойн тус газраа буудуулсан" хэмээн мэдээлжээ. Тус улсад цагдаа, цэргийнхэн ард иргэдийнхээ эсрэг хүч хэрэглэснээс үүдэн өдөр бүр хүний амь үрэгдэж, өнөөдрийг хүртэл 500 гаруй хүн амь насаа алдаад байгаа юм.

Мьянмарын цэргийн эрхтнүүд хоёрдугаар сарын 1-нд нэг жилийн хугацаатай онц байдал зарлаж, бүх эрх мэдлийг гартаа авсан.

Өнгөрсөн 2020 оны арваннэгдүгээр сард болсон парламентын сонгуулийн үеэр луйвар хийсэн тул ийм шийдвэр гаргасан гэж цэргийнхэн мэдэгдсэн юм. Мьянмарчууд цэргийн эргэлтийг эсэргүүцэн жагсаж эхэлсэн бөгөөд аюулаас хамгаалах хүчнийхэн жагсагчдын эсрэг хүч хэрэглэсээр байгаа билээ.