Сүхбаатар аймгийн Түмэнцогт сумын Лхүмбэ багийн “Баянцагаан-Уул” гэдэг газар зургадугаар сарын 27-нд 17:00 цагийн орчимд зугаалж явсан найман хүний нэг нь Хэрлэн голд осолдож, амиа алджээ.

Энэ тухай дуудлага мэдээллийг тус өдрийн 17:25 цагт бүртгэгдсэн байна. Улмаар Сүхбаатар аймгийн Онцгой байдлын газрын Түмэнцогт сум дахь Эрэн хайх, аврах бүлэг, Хэнтий аймгийн Онцгой байдлын газрын Эрэн хайх, аврах салбар, Түмэнцогт сум дахь цагдаагийн хэсгийн алба хаагчид, сумын Засаг даргын Тамгын газрын ажилтнууд, ар гэрийнхэн нийслэлийн Баянзүрх дүүргийн харьяат 31 настай, эрэгтэй Т-г эрэн хайх ажиллагааг зохион байгуулжээ. Ингэснээр өчигдөр буюу энэ сарын 29-ний 20:16 цагт осолдсон газраас зүүн зүгт 38 км буюу Дорнод аймгийн Хөлөнбуйр сумын Батхаан багийн “Өндөр цэгц” гэдэг газраас цогцсыг олж Цагдаагийн байгууллагад шилжүүлэн өгсөн байна.