Увс аймгийн Мал эмнэлгийн газрын ерөнхий нягтлан бодогч Ц.Өлзийбатад холбогдох хэргийг шүүхэд шилжүүлэх саналтайгаар прокурорын байгууллагад хүргүүлжээ. Тодруулбал, түүнийг Мал эмнэлгийн газраас акталсан автомашиныг  хувьдаа завшсан гэх үндэслэлээр хууль хяналтын байгууллагаас шалгаж эхэлсэн байдаг. Ц.Өлзийбат нь байгууллагаас акталсан автомашиныг борлуулахдаа дуудлага худалдааг нэр төдий зохион байгуулж, өөртөө болон бусдад давуу байдал олгосон гэх.

Энэ талаар Увс аймгийн Мал эмнэлгийн газрын ерөнхий нягтлан бодогч Ц.Өлзийбатаас тодрууллаа. Тэрбээр “Хуулийн байгууллага шалгаж байгаа хэргийг би ярих боломжгүй байна. Одоогийн байдлаар ажлаа хийж байна. Дуудлага худалдаагаар борлуулсан автомашин нь 2009 онд үйлдвэрлэсэн  “УАЗ-469”, 1994 онд үйлдвэрлэсэн “Ланд-80” байсан. Эдгээр автомашиныг дуудлага худалдаагаар борлуулахдаа эрх мэдэл, албан тушаалын байдлаа урвуулан ашигласан гэдэг нь тогтоогдоогүй байна” гэв.