Өчигдөр буюу гуравдугаар сарын 3-ны 18:00 цагийн үед цахим сүлжээнд нэгэн бичлэг цацагдсан билээ. Тодруулбал, Хан-Уул дүүргийн нутаг дэвсгэрт зорчиж явсан 1611 УВС улсын дугаартай “Приус-30” маркийн автомашины жолооч, зорчигч нар “Машиныхаа цонхоор хог хаялаа” хэмээн шаардлага тавьсан жолоочийг бейсболын цохиураар зодож, танхайрсан гэх. Бид энэ талаар  1611 УВС улсын дугаартай “Приус-30” маркийн автомашины жолоочтой холбогдож, тодрууллаа.

            -“Цонхоороо хог хаялаа” хэмээн шаардлага тавьсан жолоочийг дээрэлхэж, бейсболын цохиураар зодох гэж дайрч байгаа бичлэг тань цахим сүлжээнд цацагдлаа. Яагаад ийм үйлдэл гаргасан юм бэ?

         -Ахтайгаа цуг Хан-Уул дүүрэгт зорчиж явсан. Манай ах тамхиа татаад цонхоороо ишийг нь хаячихсан юм билээ. Ингэхдээ тамхиа бүрэн унтраагаагүй байсан гэсэн. Түгжрэл дунд зогсож байхад ар талд зогсож байсан автомашины жолооч бууж ирсэн. Бууж ирээд, тамхины ишийг газраас аваад, “Цонхоо буулга” гэж хэлсэн. Цонхоо буулгаад “Юу болсон бэ” гэж хэлэхийн завдалгүй унтраагүй тамхины ишийг ахын маань нүүрэн дээр дараад унтраасан. Тэгээд л маргаан үүсээд, бид хоёр бууж ирсэн. Хэдийгээр манай ах тамхины ишээ хаясан нь буруу ч шаардлага зөв тавих хэрэгтэй шүү дээ. Хүний нүүрэн дээр тамхи дарж унтраагаад, цээж рүү нь хогийг нь хийх буруу гэж бодож байна.

-Та хоёр жолоочийг зодох гэж байгаа юм шиг харагдсан. Зодоон болсон юм уу?

        -Тэр жолооч урд талын камерынхаа бичлэгийг эвлүүлээд оруулсан байна лээ. Уг нь бол бид хоёр зодоон хийгээгүй. Маргалдаж байгаад салсан. Хүмүүс буруугаар ойлгоод бидэн рүү их дайрч байна. Дарамтад орж, сэтгэл санаа хүнд байна. Бидэнтэй маргалдсан машины жолооч багаажнаасаа том түлхүүр бариад гараад ирэхээр нь би биеэ хамгаалах гээд бейсболын цохиур машиныхаа араас авсан.  

-Цагдаагийн байгууллагаас холбогдсон уу?

           -Яг одоо би цагдаагийн газар руу шалгуулахаар явж байна. Тэр хэсгийн 360 камерыг шүүлгэж, юу болсон талаар тайлбарлах болно.