УИХ-ын Нийгмийн бодлогын байнгын хорооны Ажлын хэсэг Өвөрхангай аймгийн Арвайхээр, Хархорин суманд ажиллажээ. Уг томилолтыг УИХ-ын С.Чинзориг санаачлан ахалж явсан бөгөөд ЭМЯ-ны төрийн нарийн бичгийн дарга Ц.Эрдэмбилэг, Эрүүл мэндийн даатгалын ерөнхий газрын дарга Л.Бямбасүрэн нарын арван орчим гишүүн Ажлын хэсгийн бүрэлдэхүүнд багтсан байна.

УИХ-аас Эрүүл мэндийн тухай хууль, Эрүүл мэндийн даатгалын тухай хууль, Эм, эмнэлгийн хэрэгслийн тухай хуулинд нэмэлт өөрчлөлт оруулж,  эрүүл мэндийн даатгалын санхүүжилтийн тогтолцоонд шинэчлэлт хийсэнтэй холбоотойгоор Өвөрхангай аймгийн эрүүл мэндийн салбарын ажилтан, албан хаагчдад мэдээлэл өгч, зарим асуудлыг газар дээр нь шийдвэрлэсэн юм.

Мөн коронавирусийн нөхцөл байдал, авч байгаа арга хэмжээний үр дүн, засварын ажил, тоног төхөөрөмжийн үйл ажиллагатай газар дээр нь танилцаж, санал бодлоо солилцлоо. ЭМЯ-аас амьсгалын аппарат, бусад нэн шаардлагатай багаж хэрэгслийг шийдвэрлэсэн бол аймгийн Засаг даргаас 464 сая төгрөгийн тоног төхөөрөмжийг аймгийн БОЭТ болон сумдын эмнэлэгт авч өгөхөөр шийдвэрлэлээ.

Түүнчлэн Хархорин сумын Нэгдсэн эмнэлгийн барилгын шинэчлэлийн асуудлын талаар ярилцсан бөгөөд мэргэжлийн хяналтын байгууллагаар дүгнэлт гаргуулахаар болов. Тус эмнэлэгт шаардлагатай байгаа тоног төхөөрөмжүүд, түргэн тусламжийн машин, Эрүүл мэндийг дэмжих төв байгуулах санхүүжилтыг УИХ-ын гишүүн С.Чинзориг шийдвэрлэх тухай мэдэгдэв.