“ЭНХИЙН МАНАА” ДУУГ ДОЛОО ХОНОГИЙН ДОТОР КЛИПЖҮҮЛЖЭЭ 

“Цэргийн албанд татагдан очоод

Цэрэг шинээл даахтай үгүйтэй

Явган маршийн ард хоцорсон

Ядарч яваа шинэ цэрэг би

Хайрт минь чи минь

Хүлээгээрэй намайгаа

Хугацаат цэргийн албаа хаагаад

Хонгор чамдаа очноо би .

Хөл тавихдаа өрөөлдөж будилсан

Хоногийн ээлжинд үүргэлж ядарсан

Жагсах бүрдээ зэмлэл сонссон

Жирийн нэгэн шинэ цэрэг

Эрх чөлөөт Монгол нутаг

Эх орноо хамгаалъя

Эзэн Чингис халхын нутагт

Энэ биеэ зориулъя” хэмээх “Энхийн манаа” дууг мэдэхгүй монгол хүн үгүй ээ. Цэцэрлэг, сургуулийн насны хүүхдүүд хүртэл цэрэг хувцас өмсчихөөд дуулж байдгийг та бүхэн санаж байгаа биз ээ. Бид монгол цэргийн баярыг тохиолдуулан Мистер хамтлагийн “Энхийн манаа” дуу хэрхэн “төрсөн” болохыг онцолж байна. 

ЖАГСААЛЫН ДУУНЫ АЯЛГУУНААС “ЭНХИЙН МАНАА”  ДУУ “ТӨРСӨН”

      2000-аад оны эхэн үед “Мистер” хамтлаг зургаан гишүүний бүрэлдэхүүнтэй Чамдаа дууг гаргаад удаагүй байжээ. Тухайн үед тэд 18, 19, 20-той залуус байсан гэдэг. Нэгэн удаа тус хамтлагийн гишүүн болох Хүнээгийн ах тэдэнд цэргийн тухай дуу хийх санал тавьсан нь өнөөгийн бидний сонсох, дагаж дуулах дуртай “Энхий манаа” дуу бүтэх эхлэл нь болж байжээ. Тэд ахынхаа саналыг дуртай нь аргагүй хүлээн авч, найзынхдаа тойрч сууж байгаад л үг, аяыг нь бичиж эхэлсэн гэдэг. Тухайн үед зарим нь цэрэгт явсан байсан учир цэргийн амьдрал хэрхэн өнгөрдөг тухай мэдэх ч гэлээ аав, ах нараасаа дахин зөвлөгөө авч, дууныхаа үгийг бичиж байсан гэдэг. Тэгэхээр Энхийн манаа дуу зургаан хүний оюун ухаан, үзэл бодол, авьяаснаас бүтсэн гэсэн үг. Тэд долоо хоногийн дотор л Энхий манаа дууг бүтээж, клипжүүлсэн гэдэг. Тухай үед тэд цэргийн амьдрал хэрхэн өрнөдөг, халагдах дөхөхөөрөө хэрхэн баярлаж, догдолж, хувцсаа бэлдчихээд нойргүй хонодог тухай нь илүүтэй харуулахыг хичээсэн гэдэг. 

“ЦЭРГИЙН БОДОЛ” ДУУТАЙ НЭГ ЦАГ ҮЕД ТӨРСӨН ЭРЧҮҮДИЙН СҮЛД ДУУ БОЛ

“ЭНХИЙН МАНАА”

       Энэ талаар тус хамтлагийн гишүүн А.Энхтайванаас тодруулахад “Энхийн манаа дууны аяыг хийхдээ бид тухай үеийн Жагсаалын тухай дууны дахилтын аялгуунаас санаа авч байсан. Тэгээд дууныхаа аялгуутай илүү ритмтэй болгож, өгснөөр Энхийн манаа дуу өнөөдрийг хүртэл сонсогчдын хайртай дуу хэвээр байна. Энэ дуу бол яах аргагүй цэрэг бүхний, цэргийн алба хаасан хэн бүхний сүлд дуу болж чадсан. Мөн манай хамтлагийн сүлд дуу. Тухайн үед “Хурд” хамтлагийн “Цэргийн бодол” дуутай нэгэн цаг үед төрж байсан болохоор уншигчид болон уран бүтээлчид бидний бүтээлийг өрсөлдөөн гэж хардаг байсан. Харин одоо бүгд адилхан сонсож байгаад нь баяртай байдаг. Монгол хүн бүрийн аманд орчихсон амьтай дуу гэж боддог. Тэр утгаараа бид жил бүрийн гуравдугаар сарын 18-нд эвент зохион байгуулж, дуугаа дуулдаг. Хүмүүст манай эвентэд дуртай ирдэг болсон байна лээ. Энэ дууны үг бүрийг бид өөрсдөө бичсэн. Би цэрэгт яваагүй ч гэлээ таван ахтай учраас тэднээсээ цэргийн амьдралын тухай сонсож, цэрэгт очоод удаагүй байхад ямар байдаг халагдах дөхөхөөрөө хэрхэн догдолдог, цэрэгт явахаар эх орны тухай ямар бодолтой болдог вэ гэдгийг яриулж байсан. Тэр утгаараа их баялаг түүхтэй бүтээл гэж боддог" гэсэн юм.